शिवराज मोटेगावकर यांना ९ दिवसांची CBI कोठडी; NEET पेपरफुटी प्रकरणात मोठे खुलासे होण्याची शक्यता

एज्युवार्ता न्यूज नेटवर्क 

नीट- युजी २०२६ ( NEET-UG 2026) पेपर फुटी प्रकरणात (NEET Paper Leak Scandal) लातूर येथील प्रसिद्ध रेनुकाई केमिस्ट्री क्लासेसचे (RCC) संस्थापक आणि संचालक प्रा. शिवराज मोटेगावकर (Prof. Shivraj Motegaonkar) यांना सीबीआयने अटक केली. त्यानंतर त्यांना सीबीआय चौकशीसाठी ताब्यात घेण्यासाठी न्यायालयात हजर करण्यात आले होते. पुणे न्यायालयाने मोटेगावकर याची ९ दिवसांची सीबीआय कोठडी (9 days CBI custody) मंजूर केली असून, या काळात मोठ्या खुलाशांची शक्यता वर्तवली जात आहे. 

सीबीआयने मोटेगावकर यांच्या मोबाईलमध्ये परीक्षेच्या १० दिवस आधी (२३ एप्रिल २०२६) चा लीक्ड प्रश्नपत्रिका सापडल्याचा दावा केला आहे. त्यांना या प्रकरणातील सक्रिय सदस्य म्हणून ओळखले जात आहे. आरसीसीने घेतलेल्या मॉक टेस्टमध्ये NEET मुख्य परीक्षेतील ४२ केमिस्ट्री प्रश्न जसेच्या तसे आल्याने आधीच संशय व्यक्त करण्यात आला होता. CBI च्या तपासात मोटेगावकर यांचा NTA शी संबंधित इतर आरोपींशी (जसे पी.व्ही. कुलकर्णी) कनेक्शन समोर येत आहे.

मोटेगावकर यांनी संघटित टोळीशी संगनमत करून पेपर फुटी आणि प्रसार केल्याचे प्राथमिक तपासात समोर आले आहे. त्यांच्या पुणे आणि लातूर कार्यालयांवर छापे टाकण्यात आले असून, दस्तऐवज आणि इलेक्ट्रॉनिक उपकरणे जप्त करण्यात आली आहेत. आरसीसीच्या विद्यार्थ्यांचीही चौकशी सुरू आहे. यातून मोठी माहिती समोर येण्याची शक्यता आहे, असा दावा सीबीआयने केला आहे.

मोटेगावकर हे महाराष्ट्रातील NEET तयारीसाठी अत्यंत लोकप्रिय चेहरा आहेत. त्यांच्या आरसीसी संस्थेच्या महाराष्ट्रभर शाखा आहेत आणि लाखो विद्यार्थ्यांनी त्यांच्याकडून मार्गदर्शन घेतले आहे. या अटकेने कोचिंग क्षेत्रात खळबळ उडाली आहे. पेपर लीकमुळे होणारे मानसिक आणि शैक्षणिक नुकसान भरून निघणार नाही, अशी भावना विद्यार्थ्यांमध्ये आहे.

CBI अधिकाऱ्यांनी सांगितले की, ९ दिवसांच्या कोठडीत मोटेगावकर यांच्याकडून इतर सहभागी, नेटवर्क आणि पेपर फुटीचा स्रोत याबाबत महत्त्वाचे खुलासे होण्याची शक्यता आहे. प्रकरणात आणखी अटका होण्याचीही शक्यता वर्तवली जात आहे.