सचिन सावंत यांनी प्रसिद्ध केलेली यादी चुकीची;CET Cellचा खुलासा
ट्विटमध्ये दिलेला निकालाचा तपशील व सीईटी कक्षाने प्रसिद्ध केलेली गुणवत्ता यादी यामध्ये कोणताही संबंध दिसून येत नाही. सीईटीच्या मूळ अस्थायी गुणवत्ता यादीची सुरुवात विद्यार्थ्यांच्या एप्लीकेशन आयडी मध्ये इएन पासून होते. परंतु ट्विट केलेल्या या यादीमध्ये एप्लीकेशन आयडी मध्ये पीसीएम पासून सुरुवात केलेली आहे. त्यामुळे ट्विटमधील यादी व सीईटीची यादी याचा संबंध नाही.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य माध्यमिक व उच्च माध्यमिक शिक्षण मंडळाच्या (एसएससी एचएससी बोर्ड) परीक्षेत विद्यार्थ्यांना 40 ते 45 टक्के गुण मिळतात; तर सीईटी सेलच्या माध्यमातून घेतल्या जाणाऱ्या परीक्षेत विद्यार्थ्यांना 99 ते 100 पर्सेंटाईलपर्यंत गुण मिळतात, असा आरोप काँग्रेसचे प्रवक्ते सचिन सावंत यांनी केला होता. त्यावर सीईटी सेलने खुलासा केला असून सावंत यांनी प्रसिद्ध केलेली यादी सीईटी सेलची नाही. त्यामुळे या यादीचा आणि विद्यार्थ्यांना मिळालेल्या गुणांचा काही संबंध नाही,असे सीईटी सेलतर्फे स्पष्ट करण्यात आले आहे.
नेट पेपर फुटीच्या पार्श्वभूमीवर सचिन सावंत यांनी राज्य सामायिक प्रवेश परीक्षा कक्षातर्फे घेतल्या जाणाऱ्या परीक्षांच्या निकालाबाबत माहिती प्रसिद्ध केली. त्यात काही टॉपर्सना बोर्ड परीक्षेत मिळालेल्या गुणवत्तेवर प्रश्नचिन्ह उपस्थित केला. तसेच सीईटी सेलची यादी सोशल मीडियावर प्रसिद्ध करून सीईटी सेलच्या परीक्षेच्या पारदर्शकतेबाबत प्रश्नचिन्ह उपस्थित केले. त्यावर सीईटी सेलने खुलासा प्रसिद्ध केला आहे.
सीईटी सेलने प्रसिद्ध केलेल्या परिपत्रकानुसार सचिन सावंत यांनी सोशल मीडियावर बीई आणि बीटेक च्या अस्थाई गुणवत्ता यादीवर ट्विट केले. सदर इमेजची पडताळणी केली असता ही इमेज चुकीची असल्याचे निदर्शनास आले. ट्विटमध्ये दिलेला निकालाचा तपशील व सीईटी कक्षाने प्रसिद्ध केलेली गुणवत्ता यादी यामध्ये कोणताही संबंध दिसून येत नाही. सीईटीच्या मूळ अस्थायी गुणवत्ता यादीची सुरुवात विद्यार्थ्यांच्या एप्लीकेशन आयडी मध्ये इएन पासून होते. परंतु ट्विट केलेल्या या यादीमध्ये एप्लीकेशन आयडी मध्ये पीसीएम पासून सुरुवात केलेली आहे. त्यामुळे ट्विटमधील यादी व सीईटीची यादी याचा संबंध नाही. याचबरोबर यादीतील इतर तपशीलही जुळत नाहीत.
विद्यार्थ्यांचा प्रवर्ग त्यांचे बारावी व दहावीतील गुण सिटीतील परसेंटाइल गुण हे जुळत नाहीत. त्यामुळे विद्यार्थ्यांनी या अस्थाई गुणवत्ता यादीच्या इमेज वर विश्वास ठेवू नये, सीईटी सेल ची प्रोव्हिजनल मेरिट लिस्ट व अंतिम मेरिट लिस्ट संकेतस्थळावर उपलब्ध आहे,असे प्रसिध्दी पत्रक सीईटी सेलने प्रसिध्द केले आहे.
