मराठी साहित्य आणि विज्ञानाचा अनोखा संगम; गुरुवारी विज्ञान साहित्य नांदी संमेलन

शंभराव्या अखिल भारतीय मराठी साहित्य संमेलनाच्या पार्श्वभूमीवर पुण्यात आयोजन; डॉ. पंडित विद्यासागर अध्यक्षस्थानी, डॉ. शेखर मांडे प्रमुख पाहुणे

मराठी साहित्य आणि विज्ञानाचा अनोखा संगम; गुरुवारी विज्ञान साहित्य नांदी संमेलन

एज्युवार्ता न्यूज नेटवर्क 

 मराठी साहित्य आणि विज्ञान यांचा अनोखा संगम घडवून आणण्याच्या उद्देशाने शंभराव्या अखिल भारतीय मराठी साहित्य संमेलनाच्या निमित्ताने विज्ञान साहित्य नांदी संमेलनाचे आयोजन करण्यात आले आहे. गुरुवारी (दि. २६) एस. पी. कॉलेज मैदानाजवळील ज्ञानमंडपम येथील भाऊसाहेब चितळे सभागृहात हे एकदिवसीय संमेलन होणार आहे. महाराष्ट्र साहित्य परिषद, शिक्षण प्रसारक मंडळी, पुणे आणि विज्ञान भारती पश्चिम महाराष्ट्र यांच्या संयुक्त विद्यमाने या संमेलनाचे आयोजन करण्यात आले आहे, अशी माहिती विज्ञान भारती पश्चिम महाराष्ट्राचे अध्यक्ष डॉ. नितीन करमाळकर यांनी पत्रकार परिषदेत दिली.

या संमेलनाच्या अध्यक्षस्थानी ज्येष्ठ भौतिकशास्त्रज्ञ, विज्ञान लेखक आणि माजी कुलगुरू डॉ. पंडित विद्यासागर असणार आहेत. वैज्ञानिक व औद्योगिक संशोधन परिषदेचे (सीएसआयआर) माजी महासंचालक डॉ. शेखर मांडे प्रमुख पाहुणे म्हणून उपस्थित राहणार आहेत. तसेच महाराष्ट्र साहित्य परिषदेचे अध्यक्ष योगेश सोमण, प्रमुख कार्यवाह डॉ. स्वाती महाळंक, समर्थ युवा फाउंडेशनचे अध्यक्ष राजेश पांडे यांच्यासह विविध क्षेत्रांतील मान्यवर सहभागी होणार आहेत.

मराठी भाषेतून विज्ञानाचा प्रसार, विज्ञानविषयक साहित्याचा गौरव तसेच नवोदित लेखक आणि विज्ञान संवादकांना व्यासपीठ उपलब्ध करून देणे हा संमेलनाचा प्रमुख हेतू आहे. मराठी भाषेवर प्रेम करणाऱ्या आणि मराठीतून विज्ञानाचा प्रचार-प्रसार करू इच्छिणाऱ्यांनी मोठ्या संख्येने सहभागी व्हावे, असे आवाहन डॉ. करमाळकर यांनी केले.

शिक्षण प्रसारक मंडळीचे व्यवस्थापन मंडळाचे अध्यक्ष सुधीर काळकर म्हणाले, की संस्थेच्या संशोधन, इनोव्हेशन व इन्क्युबेशन केंद्राच्या संयोजनातून हे संमेलन होत आहे. शिक्षण, विज्ञान आणि साहित्य या तीन क्षेत्रांना एकत्र आणण्याची ही महत्त्वपूर्ण संधी आहे. विद्यार्थ्यांमध्ये वैज्ञानिक दृष्टिकोन विकसित करण्याबरोबरच नवनिर्मिती, संशोधन आणि स्टार्टअप संस्कृतीला प्रोत्साहन देण्याचा संमेलनाचा उद्देश आहे.

विज्ञान भारतीचे सचिव कौस्तुभ साखरे यांनी संमेलनातील कार्यक्रमांची माहिती दिली. उद्घाटन व समारोप सत्रांसह विज्ञानकथा वाचन, विज्ञान साहित्यिक परिसंवाद, शास्त्रज्ञांशी विशेष संवाद आणि पॉडकास्ट अशा विविध उपक्रमांचे आयोजन करण्यात आले आहे. यावेळी मराठी विज्ञानकथा लेखन आणि अभिवाचन स्पर्धेची घोषणाही करण्यात येणार आहे.

विद्यार्थ्यांना विज्ञान आणि मराठी साहित्याची गोडी लागावी, यासाठी विशेष स्पर्धांचे आयोजन करण्यात आले आहे. विज्ञानकथा अभिवाचन स्पर्धेत विद्यार्थ्यांनी उत्स्फूर्त सहभाग घेतला असून, स्पर्धेचा निकाल संमेलनाच्या समारोप सत्रात जाहीर केला जाणार असल्याचे शिक्षण प्रसारक मंडळीच्या सचिव रमा कुलकर्णी यांनी सांगितले.

विज्ञानकथा स्पर्धेचे प्रायोजकत्व पिंपरी चिंचवड कॉलेज ऑफ इंजिनिअरिंगने स्वीकारले आहे. या महाविद्यालयात दोन शाखांचे अभ्यासक्रम मराठी माध्यमातून शिकवले जात असल्याची माहिती विभागप्रमुख डॉ. संजीवनी सोनार यांनी दिली.

पत्रकार परिषदेला विज्ञान भारतीचे पश्चिम क्षेत्र संघटनमंत्री श्री प्रसाद, संशोधन, इनोव्हेशन व इन्क्युबेशन केंद्राचे संचालक डॉ. प्रशांत दुराफे यांच्यासह मान्यवर उपस्थित होते.