MPSC चा लाखो विद्यार्थ्यांना दिलासा! परीक्षा शुल्क न भरता अर्ज अपडेट करण्याची संधी

महाराष्ट्र लोकसेवा आयोगाने महाराष्ट्र गट-क सेवा संयुक्त पूर्व परीक्षा २०२६ संदर्भात एक महत्त्वाचे शुद्धीपत्रक जारी केले आहे. यामुळे लाखो तरुण उमेदवारांना मोठा दिलासा मिळाला आहे.

MPSC चा लाखो विद्यार्थ्यांना दिलासा! परीक्षा शुल्क न भरता अर्ज अपडेट करण्याची संधी

एज्युवार्ता न्यूज नेटवर्क

महाराष्ट्र लोकसेवा आयोगाने महाराष्ट्र गट-क सेवा संयुक्त पूर्व परीक्षा २०२६ संदर्भात एक महत्त्वाचे शुद्धीपत्रक जारी केले आहे. यामुळे लाखो तरुण उमेदवारांना मोठा दिलासा मिळाला आहे. आयोगाने काही पदांसाठी आवश्यक शैक्षणिक अर्हतेबाबत स्पष्टीकरण दिले असून, पूर्वी अर्ज केलेल्या उमेदवारांना आपल्या प्रोफाइलमधील शैक्षणिक माहिती सुधारित करण्याची संधी उपलब्ध करून दिली आहे. ही प्रक्रिया पूर्णपणे शुल्कमुक्त असून उमेदवारांना पुन्हा परीक्षा शुल्क भरावे लागणार नाही.

आयोग मार्फत गट-क संवर्गातील विविध पदांसाठी एकूण २६ हजार ७३७ रिक्त जागांची भरती प्रक्रिया सुरू आहे. पूर्वी प्रसिद्ध झालेल्या जाहिरातीत काही पदांच्या शैक्षणिक पात्रतेबाबत अस्पष्टता होती. त्यामुळे आयोगाने नवीन शुद्धीपत्रकाद्वारे अधिक स्पष्टता आणली आहे. यामुळे संबंधित उमेदवारांना आपली शैक्षणिक अर्हता तपासून आवश्यक बदल करता येणार आहेत. मूळ जाहिरातीतील इतर अटी व शर्तींमध्ये मात्र कोणताही बदल केलेला नाही.

उमेदवारांनी ऑनलाइन अर्ज प्रणालीमध्ये प्रथम प्रोफाइल क्रिएशन विभागात जाऊन शैक्षणिक अर्हता सुधारित करावी आणि प्रोफाइल लॉक करावी. त्यानंतर माय अकाउंटमधील क्वालिफिकेशन अपडेट पर्यायाचा वापर करून माहिती अद्ययावत करावी. पुढे रिचेक एलिजिबिलिटी या पर्यायावर क्लिक करून पात्रता तपासावी. आवश्यक असल्यास संबंधित संवर्गासाठी अप्लाय व सबमिट करावे. पूर्वीचा अर्ज रद्द करण्याची अजिबात गरज नाही.

आयोगाने सर्व संबंधित उमेदवारांना शुद्धीपत्रकातील सूचनानुसार शैक्षणिक माहिती तात्काळ अद्ययावत करण्याचे आवाहन केले आहे. या सुविधेमुळे अनेक उमेदवारांना पुन्हा शुल्क भरून अर्ज करण्याची आर्थिक आणि वेळेची अडचण टाळता येणार आहे. योग्य पात्रता असलेल्या तरुणांना संधी मिळावी यासाठी आयोगाने ही लवचिक व्यवस्था केली आहे. उमेदवारांनी अधिकृत संकेतस्थळावर जाऊन प्रक्रिया पूर्ण करावी, असे आवाहन करण्यात आले आहे.