देशासमोरील आगामी २० वर्षांतील सर्वात मोठे आव्हान राजकारणाचे : डॉ. प्रवीण तोगडिया

‘श्रद्धा, ओळख आणि संविधान’ या विषयावर भूमिका मांडताना तोगडिया यांनी भारताच्या सांस्कृतिक प्रवासाचा उल्लेख केला. जगभरात दुष्काळ, स्थलांतर आणि युद्धांमुळे विविध संस्कृती व सभ्यतांची देवाणघेवाण होत आली आहे. भारतातही अनेक धर्म, संस्कृती आणि सभ्यता आल्या आणि भारतीय संस्कृतीत मिसळून गेल्या. या प्रक्रियेचा भारताला फायदा झाला.

देशासमोरील आगामी २० वर्षांतील सर्वात मोठे आव्हान राजकारणाचे : डॉ. प्रवीण तोगडिया

एज्युवार्ता न्यूज नेटवर्क 

देशासमोरील आगामी २० वर्षांतील सर्वात मोठे आव्हान राजकारणाचे असणार आहे. या आव्हानाचा समर्थपणे सामना करण्यासाठी देशाला समजूतदार आणि जागरूक नागरिकांची गरज आहे. नागरिकांनी मतदान करताना जात किंवा अन्य बाबींचा विचार न करता उमेदवाराचे कर्तृत्व आणि कार्यक्षमता पाहून मतदान करावे, असे आवाहन आंतरराष्ट्रीय हिंदू परिषदेचे राष्ट्रीय अध्यक्ष डॉ. प्रवीण तोगडिया यांनी केले.

एमआयटी वर्ल्ड पीस युनिव्हर्सिटीच्या स्कूल ऑफ गव्हर्नमेंट, स्कूल ऑफ लॉ, स्कूल ऑफ लिबरल आर्ट्स आणि डिपार्टमेंट ऑफ इकॉनॉमिक्स अँड पब्लिक पॉलिसी यांच्या संयुक्त विद्यमाने कोथरूड येथील एसओजी हॉलमध्ये ‘श्रद्धा, ओळख आणि संविधान’ या विषयावर आयोजित विशेष व्याख्यानात ते बोलत होते. यावेळी विद्यापीठाचे कुलगुरू प्रा. डॉ. रविराज एन. सीतारमण उपस्थित होते. विद्यापीठाचे कार्याध्यक्ष डॉ. राहुल विश्वनाथ कराड यांच्या मार्गदर्शनाखाली हा कार्यक्रम पार पडला.

विद्यार्थ्यांच्या प्रश्नांना उत्तरे देताना डॉ. तोगडिया यांनी देशातील शिक्षण व्यवस्थेतील त्रुटींवर बोट ठेवले. ते म्हणाले, दरवर्षी देशातील सुमारे पाच लाख विद्यार्थी उच्च शिक्षणासाठी परदेशात जात आहेत. ही चिंतेची बाब आहे. देशातील शिक्षण व्यवस्थेत गुणवत्तापूर्ण सुधारणा करणे, शिक्षणासाठी जीडीपीतील तरतूद वाढविणे आणि शैक्षणिक शुल्क कमी करणे आवश्यक आहे. प्रत्येक मुलाला गुणवत्तापूर्ण शिक्षण मिळाले पाहिजे. शिक्षण व्यवस्था जागतिक दर्जाची केल्याशिवाय भारताची प्रगती शक्य नाही.

‘श्रद्धा, ओळख आणि संविधान’ या विषयावर भूमिका मांडताना त्यांनी भारताच्या सांस्कृतिक प्रवासाचा उल्लेख केला. जगभरात दुष्काळ, स्थलांतर आणि युद्धांमुळे विविध संस्कृती व सभ्यतांची देवाणघेवाण होत आली आहे. भारतातही अनेक धर्म, संस्कृती आणि सभ्यता आल्या आणि भारतीय संस्कृतीत मिसळून गेल्या. या प्रक्रियेचा भारताला फायदा झाला. पूर्वजांचे विचार, आचार-विचार आणि जीवनपद्धती यांतून आपली संस्कृती घडली आहे. विविध बदल होऊनही हिंदू ओळख कायम राहिली, असे मत त्यांनी व्यक्त केले.

संविधानाच्या संदर्भात बोलताना डॉ. तोगडिया म्हणाले की, संविधानाची निर्मिती आपणच केली असून संसदेतील दोन तृतीयांश बहुमताच्या आधारे त्यात बदल करता येतात. आतापर्यंत संविधानात शंभरहून अधिक दुरुस्त्या करण्यात आल्या आहेत. त्यामुळे संविधानात बदल होऊ शकत नाही, असे म्हणणे योग्य नाही. गरज पडल्यास हिंदू ओळखीच्या रक्षणासाठी संविधानात आणखी एक बदल केला जाईल, अशी भूमिकाही त्यांनी मांडली.

संविधान, कायदा आणि सरकार या तिन्ही संस्थांचा सन्मान करणे आवश्यक आहे. कायदे संविधानाच्या आधारे तयार होतात आणि सरकार कायद्यांनुसार काम करते. मात्र, आपला विचार संस्कृती, सभ्यता आणि जीवनमूल्यांच्या आधारावर असला पाहिजे, असेही त्यांनी नमूद केले.कार्यक्रमाचे सूत्रसंचालन विद्यार्थिनी काजल हिने केले, तर डॉ. निमेश किल्लमशेट्टी यांनी आभार मानले.


देशात ६० कोटी लोक विविध आजारांनी ग्रस्त; मानसिक आरोग्याचेही मोठे संकट

देशातील आरोग्यविषयक परिस्थितीवर चिंता व्यक्त करताना डॉ. प्रवीण तोगडिया यांनी विविध आजारांचे वाढते प्रमाण आणि विद्यार्थ्यांमधील आत्महत्यांच्या घटनांकडे लक्ष वेधले. त्यांच्या म्हणण्यानुसार, देशातील सुमारे ६० कोटी लोक विविध आजारांनी ग्रस्त आहेत. यामध्ये २५ कोटी लोक उच्च रक्तदाब किंवा प्री-हायपरटेन्शन, १३ कोटी लोक मधुमेह, तर १० कोटी लोक लठ्ठपणाने त्रस्त आहेत. सुमारे २० कोटी लोक मानसिक आरोग्याच्या समस्यांना सामोरे जात आहेत. दरवर्षी १४ हजारांहून अधिक विद्यार्थी आत्महत्या करतात.