कोतवाल पदभरती परीक्षा पुढे ढकलली; सुधारित वेळापत्रक जाहीर
महाराष्ट्रातील महसूल सेवक अर्थात कोतवाल पदाच्या भरतीची वाट पाहणाऱ्या हजारो उमेदवारांसाठी महत्त्वाची बातमी आहे. महसूल व वन विभागाने राज्यातील रिक्त महसूल सेवक पदभरती प्रक्रियेला मुदतवाढ देत सुधारित वेळापत्रक जाहीर केले आहे.
Eduvarta
एज्युवार्ता न्यूज नेटवर्क
महाराष्ट्रातील महसूल सेवक अर्थात कोतवाल पदाच्या भरतीची वाट पाहणाऱ्या हजारो उमेदवारांसाठी महत्त्वाची बातमी आहे. महसूल व वन विभागाने राज्यातील रिक्त महसूल सेवक पदभरती प्रक्रियेला मुदतवाढ देत सुधारित वेळापत्रक जाहीर केले आहे. या निर्णयानुसार नाशिक आणि कोकण विभागात १५ नोव्हेंबर २०२६ रोजी होणार असलेली लेखी परीक्षा तूर्त स्थगित करण्यात आली आहे. आता संपूर्ण भरती प्रक्रिया जानेवारी २०२७ मध्ये पार पडणार आहे.
राज्यातील विविध जिल्ह्यांमध्ये ३१ ऑगस्ट २०२६ अखेर रिक्त असलेल्या २९१२ हून अधिक महसूल सेवक पदांसाठी शासनाने विशेष बाब म्हणून मान्यता दिली होती. पूर्वीच्या वेळापत्रकानुसार २८ नोव्हेंबर २०२६ पर्यंत निवड झालेल्या पात्र उमेदवारांना नियुक्तीपत्रे देण्याचे नियोजन होते. मात्र विधानपरिषदेच्या पदवीधर आणि शिक्षक मतदारसंघाच्या निवडणुकीच्या आचारसंहितेमुळे नागपूर, अमरावती, छत्रपती संभाजीनगर आणि पुणे या चार विभागांतील भरती यापूर्वीच स्थगित झाली होती.
नाशिक व कोकण विभागातील प्रक्रिया मात्र सुरू होती आणि १५ नोव्हेंबरला परीक्षा होणार होती. दरम्यान सामान्य प्रशासन विभागाने ५ नोव्हेंबर २०२६ रोजी शासन सेवेतील गट-अ ते गट-ड संवर्गातील भरतीसाठी वयोमर्यादेत शिथिलता देण्याचा निर्णय घेतला. ही सवलत महसूल सेवक पदासाठी लागू होते की नाही याबाबत अभिप्राय मागवण्यात आला आहे. या तांत्रिक बाबीमुळे आणि सर्व विभागांची परीक्षा एकाच वेळी घेण्याच्या उद्देशाने परीक्षा पुढे ढकलण्याचा निर्णय घेण्यात आला.
महसूल विभागाचे सहसचिव संजय बनकर यांनी १२ नोव्हेंबर रोजी काढलेल्या पत्राद्वारे सर्व जिल्हाधिकाऱ्यांना ही माहिती कळवली आहे. सुधारित वेळापत्रकानुसार तालुकानिहाय रिक्त जागांची यादी २३ ते ३० नोव्हेंबर २०२६ दरम्यान तयार केली जाईल. त्यानंतर बिंदुनामावली तयार करणे १ ते १५ डिसेंबर, भरती समिती स्थापना १५ डिसेंबर, जाहिरात प्रसिद्धी १६ ते ३१ डिसेंबर २०२६ या कालावधीत होईल.
अर्जांची छाननी १ ते ७ जानेवारी २०२७, प्रवेशपत्र उपलब्ध करणे ८ ते १५ जानेवारी, लेखी परीक्षा १७ जानेवारी, उत्तरसूची व निकाल १८ जानेवारी, दस्तऐवज पडताळणी १८ ते २५ जानेवारी आणि अंतिम नियुक्तीपत्र वाटप २६ जानेवारी २०२७ रोजी होणार आहे. उमेदवारांनी अधिकृत सूचनांकडे लक्ष देऊन तयारी सुरू ठेवावी.
