सीईटी परीक्षेचे संभाव्य वेळापत्रक जाहीर;पीजीडीएम, पीजीसीएम आणि जीएनएमची प्रथमच प्रवेश परीक्षा; पीसीएमची पहिली सीईटी १६ ते २६ एप्रिलदरम्यान
विद्यार्थ्यांनी अंतिम वेळापत्रक, अर्ज प्रक्रिया आणि परीक्षेसंदर्भातील अद्ययावत सूचनांसाठी सीईटी कक्षाच्या https://cetcell.mahacet.org/ या अधिकृत संकेतस्थळाला भेट द्यावी, असे आवाहन करण्यात आले आहे.
एज्युवार्ता न्यूज नेटवर्क
राज्यातील व्यावसायिक अभ्यासक्रमांच्या प्रवेश प्रक्रियेला गती देण्यासाठी महाराष्ट्र राज्य सामाईक प्रवेश परीक्षा कक्षाने (सीईटी सेल) शैक्षणिक वर्ष २०२७-२८ साठी २१ प्रवेश परीक्षांचे संभाव्य वेळापत्रक जाहीर केले आहे. यंदा ११ अभ्यासक्रमांसाठी विद्यार्थ्यांना दोन वेळा सीईटी देण्याची संधी मिळणार आहे. विशेष म्हणजे, पीजीडीएम, पीजीसीएम आणि जीएनएम नर्सिंग या तीन अभ्यासक्रमांसाठी प्रथमच सीईटी घेतली जाणार आहे. जानेवारी २०२७ मध्ये सुरू होणारे परीक्षांचे सत्र १० जूनपर्यंत चालणार असल्याची माहिती उच्च व तंत्र शिक्षण मंत्री चंद्रकांतदादा पाटील यांनी दिली.
विद्यार्थ्यांना प्रवेश परीक्षेत अधिक संधी मिळाव्यात आणि त्यांच्या कामगिरीत सुधारणा करण्याची संधी उपलब्ध व्हावी, या उद्देशाने दोन वेळा सीईटी घेण्यात येणाऱ्या अभ्यासक्रमांची संख्या यंदा तीनवरून ११ करण्यात आली आहे. यापूर्वी २०२६ मध्ये झालेल्या २० सीईटी परीक्षांसाठी १८ लाख १४ हजार ४५६ विद्यार्थ्यांनी नोंदणी केली होती. त्यापैकी १६ लाख ३१ हजार ३३५ विद्यार्थ्यांनी परीक्षा दिली होती.
११ अभ्यासक्रमांसाठी दोन वेळा परीक्षा
राष्ट्रीय स्तरावर जेईई मेनच्या दोन परीक्षा घेतल्या जातात. त्याच धर्तीवर महाराष्ट्रातील विद्यार्थ्यांनाही दोन संधी उपलब्ध करून देण्याचा निर्णय घेण्यात आला आहे. मागील वर्षी पीसीएम, पीसीबी आणि एमबीए/एमएमएस या तीन अभ्यासक्रमांसाठी दोन वेळा सीईटी घेण्यात आली होती. या प्रयोगाला मिळालेला प्रतिसाद लक्षात घेऊन यंदा आणखी आठ अभ्यासक्रमांचा समावेश करण्यात आला आहे.
त्यानुसार पीसीएम, पीसीबी, एमबीए/एमएमएस, पीजीडीएम, पीजीसीएम, पाच वर्षीय एलएलबी, बीएचएमसीटी, बीसीए, बीबीए, बीएमएस आणि बीबीएम या ११ अभ्यासक्रमांसाठी दोन वेळा परीक्षा होणार आहेत. विद्यार्थ्यांना पहिली सीईटी देणे बंधनकारक असून दुसरी परीक्षा ऐच्छिक असेल. दोन्ही परीक्षा दिल्यास प्रवेशासाठी अधिक पर्सेंटाइल मिळालेल्या परीक्षेचे गुण ग्राह्य धरले जाणार आहेत.
पीजीडीएम, पीजीसीएम आणि जीएनएमसाठी प्रथमच सीईटी
शासनाच्या निर्देशानुसार यंदापासून पोस्ट ग्रॅज्युएट डिप्लोमा इन मॅनेजमेंट (पीजीडीएम), पोस्ट ग्रॅज्युएट सर्टिफिकेट इन मॅनेजमेंट (पीजीसीएम) आणि जनरल नर्सिंग अँड मिडवायफरी (जीएनएम) या अभ्यासक्रमांसाठी प्रथमच स्वतंत्र प्रवेश परीक्षा घेतली जाणार आहे. पीजीडीएम आणि पीजीसीएम या दोन्ही अभ्यासक्रमांच्या परीक्षा एमबीए सीईटीसोबतच होतील. या दोन्ही अभ्यासक्रमांसाठीही दोन वेळा परीक्षा देण्याची संधी उपलब्ध असेल.
दरम्यान, तीन वर्षीय एकात्मिक बीएड-एमएड अभ्यासक्रमाची सीईटी यंदा घेतली जाणार नाही. राज्यात हा अभ्यासक्रम केवळ एका संस्थेत सुरू असून, ५५ जागांपैकी यंदा अवघ्या १२ जागांवर प्रवेश झाल्याने हा निर्णय घेण्यात आला आहे. तसेच विद्यार्थी आणि संस्थांच्या मागणीनुसार एमपीएड, एमएड आणि बीएड या परीक्षा जून महिन्यात घेण्यात येणार आहेत.
पीसीएमची पहिली परीक्षा १६ एप्रिलपासून
दोन संधी असलेल्या अभ्यासक्रमांमध्ये एमबीए/एमएमएस, पीजीडीएम आणि पीजीसीएमची पहिली परीक्षा २८ ते ३० जानेवारीदरम्यान, तर दुसरी परीक्षा १ ते ३ एप्रिलदरम्यान होईल. पाच वर्षीय एलएलबीची पहिली परीक्षा २८ आणि २९ मार्चला, तर दुसरी परीक्षा २४ मे रोजी होणार आहे.
पीसीबी समूहाची पहिली परीक्षा ८ ते १३ एप्रिल आणि दुसरी परीक्षा ६ ते ८ मेदरम्यान होईल. पीसीएम समूहाची पहिली परीक्षा १६ ते २६ एप्रिल, तर दुसरी परीक्षा १० ते १५ मेदरम्यान होणार आहे. बीएचएमसीटी, बीसीए, बीबीए, बीएमएस आणि बीबीएम या अभ्यासक्रमांची पहिली परीक्षा २८ ते ३० एप्रिल, तर दुसरी परीक्षा २७ आणि २८ मे रोजी होईल.
जूनमध्ये परीक्षांचा समारोप
इतर अभ्यासक्रमांच्या संभाव्य वेळापत्रकानुसार एमएचएमसीटीची परीक्षा २४ मार्च, एमसीएची २७ मार्च, एएसी-कला शिक्षणची ११ एप्रिल आणि बी.डिझाईनची परीक्षा १८ एप्रिल रोजी होईल. तीन वर्षीय एलएलबीची परीक्षा ४ आणि ५ मे रोजी, तर डीपीएन/पीएचएनची परीक्षा १८ मे रोजी होणार आहे.
नर्सिंगची परीक्षा १८ आणि १९ मे, तर जीएनएम नर्सिंगची परीक्षा २१ आणि २२ मे रोजी होईल. एमपीएडची परीक्षा ५ जून, एमएडची ६ जून, तर बीएड (जनरल व स्पेशल), बीएड (ईएलसीटी) आणि बीपीएड या अभ्यासक्रमांच्या परीक्षा ८ ते १० जूनदरम्यान होणार आहेत.
सीईटी कक्षाने जाहीर केलेले वेळापत्रक संभाव्य स्वरूपाचे असून, त्यात बदल होण्याची शक्यता आहे. त्यामुळे विद्यार्थ्यांनी अंतिम वेळापत्रक, अर्ज प्रक्रिया आणि परीक्षेसंदर्भातील अद्ययावत सूचनांसाठी सीईटी कक्षाच्या https://cetcell.mahacet.org/ या अधिकृत संकेतस्थळाला भेट द्यावी, असे आवाहन करण्यात आले आहे.