१०वी, १२वी उत्तीर्णांना सरकारी नोकरीची संधी! भारतीय सैन्यात विविध पदांसाठी मोठी भरती सुरू
सरकारी नोकरीच्या शोधात असलेल्या तरुणांसाठी असम रायफल्समध्ये महत्वाची संधी उपलब्ध झाली आहे. संस्थेने विविध तांत्रिक आणि संबंधित पदांसाठी एकूण ३५४ जागांची भरती प्रक्रिया जाहीर केली आहे.
एज्युवार्ता न्यूज नेटवर्क
सरकारी नोकरीच्या शोधात असलेल्या तरुणांसाठी असम रायफल्समध्ये महत्वाची संधी उपलब्ध झाली आहे. संस्थेने विविध तांत्रिक आणि संबंधित पदांसाठी एकूण ३५४ जागांची भरती प्रक्रिया जाहीर केली आहे.यात १०वी आणि १२वी उत्तीर्ण तसेच आयटीआय, डिप्लोमा आणि संबंधित पदवी धारण करणाऱ्या उमेदवारांना अर्ज करता येईल. ऑनलाइन अर्ज करण्याची अंतिम तारीख १४ डिसेंबर २०२६ ठेवण्यात आली असून भरती मेळावा १८ जानेवारी २०२७ पासून सुरू होईल.
या भरतीत वॉरंट ऑफिसर (सायफर) साठी १२४, रायफलमन (इलेक्ट्रिकल फिटर सिग्नल) साठी ३२, रायफलमन (आर्मरर) साठी २९, रायफलमन (मेसन) साठी २९ अशा प्रमुख जागा समाविष्ट आहेत. तसेच लाइनमन फील्ड, इंजिनिअर इक्विपमेंट मेकॅनिक, रिकव्हरी व्हेईकल मेकॅनिक, इलेक्ट्रिशियन, मेटलस्मिथ, वेल्डर, स्टोअर कीपर आणि इतर तांत्रिक पदांसाठीही जागा आहेत. काही पदांसाठी वॉरंट ऑफिसर स्तरावरील ड्राफ्ट्समन, ऑपरेशन थिएटर टेक्निशियन आणि फिजिओथेरपिस्ट यांचाही समावेश आहे.

शैक्षणिक पात्रता पदानुसार वेगवेगळी आहे. अनेक पदांसाठी १०वी उत्तीर्ण पुरेसे असून संबंधित ट्रेडमधील आयटीआय आवश्यक आहे. वॉरंट ऑफिसर (सायफर) पदासाठी १२वीसोबत रेडिओ-टेलिव्हिजन किंवा इलेक्ट्रॉनिक्समधील आयटीआय अथवा इलेक्ट्रॉनिक्स/आयटी पदवी अपेक्षित आहे. काही पदांसाठी इन्स्ट्रुमेंटेशन, आर्किटेक्चरल असिस्टंटशिप, ऑपरेशन थिएटर किंवा फिजिओथेरपी यांसारखे डिप्लोमा आवश्यक ठरतात.
वयोमर्यादा १ जुलै २०२६ रोजी मोजली जाईल. बहुतेक पदांसाठी १८ ते २३ किंवा १८ ते २५ वर्षे मर्यादा आहे. अनुसूचित जाती-जमाती उमेदवारांना पाच वर्षे तर इतर मागासवर्गीय उमेदवारांना तीन वर्षे वयात सवलत मिळेल. सामान्य आणि ओबीसी प्रवर्गातील उमेदवारांना शंभर रुपये अर्ज शुल्क भरावे लागेल. एससी, एसटी, माजी सैनिक आणि महिला उमेदवारांना शुल्कातून सूट आहे.
निवड झालेल्या उमेदवारांना देशभरात कुठेही नियुक्ती होऊ शकते. इच्छुक उमेदवारांनी अधिकृत जाहिरात काळजीपूर्वक वाचून पदनिहाय पात्रता, वयोमर्यादा आणि अटी तपासूनच अर्ज करावा, असे आवाहन करण्यात आले आहे.