NEET प्रकरणी २१ मे रोजी संसदीय स्थायी समितीची महत्त्वाची बैठक, NTA च्या कामाची चौकशी होणार.. 

एज्युवार्ता न्यूज नेटवर्क 
 

नीट-युजी २०२६  (NEET-UG 2026) परीक्षेतील पेपर लीक आणि गैरप्रकारांच्या (NEET Paper Leak Scam) आरोपांमुळे राष्ट्रीय प्रवेश परीक्षांच्या विश्वासार्हतेवर ढळमळली आहे. त्या पार्श्वभूमीवर संसदेची शिक्षण स्थायी समिती (Parliamentary Standing Committee) २१ मे रोजी नॅशनल टेस्टिंग एजन्सीच्या  (NTA)कामकाजाचा सखोल आढावा घेणार आहे. या बैठकीत एनटीएच्या सुधारणा, पेपर लीक प्रकरणातील सीबीय चौकशीचा (CBI Inquiry) आढावा आणि भविष्यात अशा घटना टाळण्यासाठी उपाययोजनांवर चर्चा होणार आहे.

काँग्रेस नेते दिग्विजय सिंह यांच्या अध्यक्षतेखाली होणाऱ्या या बैठकीला एनटीएचे अध्यक्ष प्रदीप कुमार जोशी, उच्च शिक्षण विभागाचे सचिव विनीत जोशी आणि शिक्षण मंत्रालयातील वरिष्ठ अधिकारी उपस्थित राहणार आहेत. ही समिती के. राध्याकृष्णन समितीच्या शिफारशींच्या अंमलबजावणीचा आढावा घेणार असून, एनटीएने आतापर्यंत काय पावले उचलली याची माहिती मागवणार आहे. सुमारे २३ लाख विद्यार्थ्यांच्या भविष्याशी संबंधित या प्रकरणामुळे केंद्र सरकारवर मोठा दबाव आला आहे.

शिक्षणमंत्री धर्मेंद्र प्रधान यांनी नीट-युजीची पुनर्परीक्षा २१ जून २०२६ रोजी घेण्याची घोषणा केली आहे. तसेच पुढील वर्षापासून परीक्षा पूर्णपणे कॉम्प्युटर बेस्ड टेस्ट (CBT) मोडमध्ये घेण्याची तयारी सुरू आहे. मात्र, विद्यार्थी, पालक आणि विरोधकांकडून एनटीएच्या संपूर्ण प्रणालीवर प्रश्नचिन्ह उपस्थित केले जात आहे. या बैठकीत फक्त नीट प्रकरणापुरती चर्चा मर्यादित राहणार नाही. शिक्षण क्षेत्रात कृत्रिम बुद्धिमत्ता (एआय) चा वाढता वापर, विद्यार्थ्यांच्या रोजगारक्षमतेत वाढ आणि परीक्षा प्रक्रियेत डिजिटल पारदर्शकता याविषयीही चर्चा होण्याची शक्यता आहे. 

आयआयटी कानपूर, इन्फोसिस सारख्या संस्थांचे प्रतिनिधी देखील या बैठकीला उपस्थित राहण्याची शक्यता वर्तवली जात आहे. ही बैठक राष्ट्रीय परीक्षांच्या भविष्यातील विश्वासार्हतेसाठी निर्णायक ठरणार असल्याचे मानले जात आहे. विद्यार्थी संघटनांनी एनटीएवर कठोर कारवाई करण्याची मागणी केली आहे. बैठकीनंतर समिती काय शिफारशी करते, याकडे सर्वांचे लक्ष लागले आहे.