SPPU विद्यापीठाची अधिसभा ५ डिसेंबरला; २४ नोव्हेंबरपर्यंत प्रस्ताव सादर करता येणार
सभेमध्ये सदस्यांना विविध शैक्षणिक, प्रशासकीय तसेच विद्यापीठाशी संबंधित विषयांवर प्रश्न उपस्थित करायचे असल्यास ते प्रश्न कुलगुरू यांच्या नावे कुलसचिव कार्यालयाकडे लेखी स्वरूपात पाठवावे लागणार आहेत. प्रश्न पाठविण्याची अंतिम मुदत २४ नोव्हेंबर २०२६ असून सायंकाळी ६ वाजेपर्यंत प्रश्न पाठवता येणार आहेत.
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या अधिसभेची (सिनेट) बैठक येत्या ५ डिसेंबर रोजी आयोजित करण्यात आली आहे. विद्यापीठाच्या मुख्य इमारतीतील संत ज्ञानेश्वर सभागृहात सकाळी ११ वाजता ही सभा होणार आहे. यासंदर्भातील अधिकृत पत्र प्रभारी कुलसचिव प्रा. (डॉ.) प्रफुल्ल पवार यांनी अधिसभा सदस्यांना पाठविले आहे.
या सभेमध्ये सदस्यांना विविध शैक्षणिक, प्रशासकीय तसेच विद्यापीठाशी संबंधित विषयांवर प्रश्न उपस्थित करायचे असल्यास ते प्रश्न कुलगुरू यांच्या नावे कुलसचिव कार्यालयाकडे लेखी स्वरूपात पाठवावे लागणार आहेत. प्रश्न पाठविण्याची अंतिम मुदत २४ नोव्हेंबर २०२६ असून सायंकाळी ६ वाजेपर्यंत प्रश्न पाठवता येणार आहेत.तसेच अधिसभा सदस्यांना सभेसाठी काही प्रस्ताव मांडायचे असल्यास महाराष्ट्र सार्वजनिक विद्यापीठ अधिनियम, २०१६ मधील संबंधित तरतुदींनुसार ते प्रस्तावही याच मुदतीत कुलसचिव कार्यालयाकडे सादर करावे लागणार आहेत.
येत्या २४ नोव्हेंबर रोजी गुरुनानक जयंतीची सार्वजनिक सुट्टी असली तरी अधिसभा सदस्यांचे प्रश्न आणि प्रस्ताव स्वीकारण्यासाठी कुलसचिव कार्यालय तसेच सभा व दप्तर विभाग सुरू राहणार असल्याचे विद्यापीठाने स्पष्ट केले आहे.
सदस्यांना प्रश्न व प्रस्ताव ई-मेलद्वारेही पाठविता येणार आहेत. त्यासाठी randm@unipune.ac.in किंवा regis@unipune.ac.in या ई-मेल पत्त्यांवर संपर्क साधण्याचे आवाहन करण्यात आले आहे. प्रश्न आणि प्रस्ताव स्वतंत्रपणे सादर करावेत तसेच प्रत्येक पानावर सदस्यांनी स्वाक्षरी करावी, अशी सूचनाही विद्यापीठ प्रशासनाने केली आहे.
अधिसभा हे विद्यापीठाचे अधिकार मंडळ असल्याने या सभेत सदस्यांकडून कोणते प्रश्न आणि प्रस्ताव मांडले जातात, याकडे विद्यापीठातील शैक्षणिक वर्तुळाचे लक्ष लागले आहे.