भारतीय कृषी संशोधन परिषदेत १३९३ पदांची मोठी भरती; १८ नोव्हेंबरपासून अर्ज प्रक्रिया सुरू
भारतीय कृषी संशोधन परिषद (ICAR) अंतर्गत विविध पदांसाठी तब्बल १३९३ जागांवर भरती जाहीर झाली आहे. ही सरकारी नोकरीची महत्त्वपूर्ण संधी असून पात्र उमेदवारांना देशभरात काम करण्याची संधी मिळणार आहे.
Eduvarta
एज्युवार्ता न्यूज नेटवर्क
भारतीय कृषी संशोधन परिषद (ICAR) अंतर्गत विविध पदांसाठी तब्बल १३९३ जागांवर भरती जाहीर झाली आहे. ही सरकारी नोकरीची महत्त्वपूर्ण संधी असून पात्र उमेदवारांना देशभरात काम करण्याची संधी मिळणार आहे. टेक्निकल असिस्टंट (T-3) पदासाठी १२५४ जागा तर सिनियर टेक्निकल असिस्टंट (T-4) पदासाठी १३९ जागा उपलब्ध आहेत. ऑनलाइन अर्ज प्रक्रिया १८ नोव्हेंबर २०२६ पासून सुरू होणार असून अंतिम मुदत १७ डिसेंबर २०२६ आहे. इच्छुक उमेदवारांनी वेळेवर अर्ज करण्याचे आवाहन करण्यात आले आहे.
दोन्ही पदांसाठी संबंधित विषयातील पदवी किंवा अभियांत्रिकीची पात्रता आवश्यक आहे. कृषी, उद्यानविद्या, कृषी अभियांत्रिकी, अन्न विज्ञान, जैवतंत्रज्ञान, पर्यावरण विज्ञान, गृह विज्ञान, संगणक विज्ञान आणि माहिती तंत्रज्ञान यांसारख्या शाखांतील पदवीधारक पात्र ठरतात. तसेच B.V.Sc. & A.H., B.F.Sc. आणि सिव्हिल, मेकॅनिकल, इलेक्ट्रिकल, इलेक्ट्रॉनिक्स यांसारख्या अभियांत्रिकी शाखांतील B.E./B.Tech. पदवी किंवा संबंधित डिप्लोमा धारकही अर्ज करू शकतात. आयटी व संगणक विज्ञान शाखेतील उमेदवारांनाही कार्यात्मक गरजेनुसार संधी आहे.
उमेदवाराचे वय १७ डिसेंबर २०२६ रोजी २१ ते ३० वर्षांच्या दरम्यान असावे. अनुसूचित जाती व जमातीच्या उमेदवारांना कमाल वयात पाच वर्षांची तर ओबीसी उमेदवारांना तीन वर्षांची सवलत मिळेल. अर्ज शुल्क सर्वसाधारण, ओबीसी व ईडब्ल्यूएस प्रवर्गासाठी ३०० रुपये आहे. मात्र अनुसूचित जाती-जमाती, माजी सैनिक, महिला व ट्रान्सजेंडर उमेदवारांना शुल्कमाफी देण्यात आली आहे.
निवड झालेल्या उमेदवारांना संपूर्ण भारतात पदस्थापना होऊ शकते. ही भरती कृषी क्षेत्रातील तरुणांसाठी आकर्षक संधी ठरणार आहे. पात्र उमेदवारांनी अधिकृत संकेतस्थळावर जाऊन संपूर्ण माहिती तपासून अंतिम मुदतीपूर्वी अर्ज प्रक्रिया पूर्ण करावी, असे आवाहन करण्यात आले आहे
