महाभारतातील आठ प्रसंग आठ शास्त्रीय नृत्यशैलींतून उलगडणार
‘अष्ट भाव, अष्ट नृत्य’चा २२ नोव्हेंबरला बालगंधर्व रंगमंदिरात प्रयोग; तिकीट विक्रीतील ५० टक्के रक्कम दुष्काळ निवारणासाठी
एज्युवार्ता न्यूज नेटवर्क
महाभारतातील अजरामर कथा यांचा अनोखा संगम पुणेकरांना अनुभवता येणार आहे. पुणे आर्ट अँड कल्चर फाउंडेशनतर्फे (पीएसीएफ) ‘अष्ट भाव, अष्ट नृत्य – महाभारत’ या विशेष नृत्यनाट्याचा दुसरा प्रयोग २२ नोव्हेंबर रोजी बालगंधर्व रंगमंदिरात सायंकाळी ५.३० वाजता सादर होणार आहे. या प्रयोगाच्या तिकीट विक्रीतून मिळणाऱ्या उत्पन्नातील ५० टक्के रक्कम महाराष्ट्रातील दुष्काळ निवारणासाठी मुख्यमंत्री सहायता निधीला देण्यात येणार आहे.
या नृत्यनाट्यात देशातील आठ शास्त्रीय नृत्यशैलींच्या माध्यमातून महाभारतातील आठ महत्त्वपूर्ण प्रसंग सादर केले जाणार आहेत. नाट्यशास्त्रात वर्णन केलेल्या आठ भावांच्या अभिव्यक्तीतून या प्रसंगांना नृत्यरूप दिले जाणार आहे. यामध्ये पुण्यासह केरळ, कर्नाटक, आसाम आणि पश्चिम बंगालमधील ५० हून अधिक कलाकार, गुरू आणि विद्यार्थ्यांचा सहभाग असणार आहे.
या उपक्रमाचा पहिला प्रयोग २९ ऑगस्ट रोजी पुणे महापालिकेच्या सहकार्याने सादर करण्यात आला होता. त्याला मिळालेल्या उत्स्फूर्त प्रतिसादानंतर दुसऱ्या प्रयोगाचे आयोजन करण्यात आले आहे.
‘‘महाभारतातील आठ प्रभावी प्रसंग, आठ शास्त्रीय नृत्यशैली आणि आठ भाव यांचा संगम या निर्मितीतून अनुभवता येणार आहे. भारताच्या कलात्मक विविधतेचा उत्सव साजरा करण्याबरोबरच महाभारतातील कालातीत कथांशी प्रेक्षकांना जोडण्याचा आमचा प्रयत्न आहे,’’ असे पीएसीएफच्या संचालिका गायत्री मिश्रा यांनी सांगितले.
लाक्षागृहाचा प्रसंग रसिका गुमास्ते यांच्या मार्गदर्शनाखाली ओडिसी नृत्यशैलीतून सादर होणार आहे. चित्रांगदा आणि अर्जुन यांची कथा कोलकात्यातील शांतिनिकेतन येथील श्रुती परफॉर्मिंग ट्रूप सादर करणार आहे.
संगीत नाटक अकादमी पुरस्कारप्राप्त कुचिपुडी नृत्यगुरू वसंत किरण आणि गुरू गायत्री आंबेकर तसेच श्रिता आंबेकर हे द्रौपदी वस्त्रहरणाचा प्रसंग सादर करतील. विराट रूप दर्शन हा प्रसंग गुरू अरुंधती पटवर्धन भरतनाट्यममधून उलगडणार आहेत.
चक्रव्यूहाचा प्रसंग आसाममधील सत्रिया नृत्यकलाकार तीर्थ कुमार नाथ आणि भारती विद्यापीठाच्या स्कूल ऑफ परफॉर्मिंग आर्ट्समधील विद्यार्थी सादर करणार आहेत. भीम-दुःशासन यांच्यातील संघर्ष कथकली नृत्यशैलीतून रंजिश नायर सादर करतील. तर कर्णाची कथा गुरू लीन केतकर कथक नृत्यशैलीतून मांडणार आहेत.
सत्रिया नृत्यशैलीच्या अभ्यासक डॉ. देविका बोर्थाकूर या संपूर्ण नृत्यनाट्याच्या सूत्रधाराची भूमिका पार पाडणार आहेत. विविध राज्यांतील नृत्यपरंपरा एकाच मंचावर आणून ‘एक भारत, श्रेष्ठ भारत’ ही संकल्पना या उपक्रमातून अधोरेखित केली जाणार आहे.
भारतीय अभिजात कलापरंपरेचा परिचय सर्वसामान्य प्रेक्षकांना करून देण्याबरोबरच कलेच्या माध्यमातून सामाजिक बांधिलकी जपण्याचा या उपक्रमाचा प्रयत्न आहे. पुणेकरांनी आणि कलाप्रेमींनी या प्रयोगाला उपस्थित राहून दुष्काळ निवारणाच्या कार्याला हातभार लावावा, असे आवाहन आयोजकांनी केले आहे.
तिकिटांसाठी -
https://www.ticketkhidakee.com/explore/all/Dance/ashta-bhava-ashta-nritya-mahabharat/6ae0693eb750a3fec118bb84
अधिक माहितीसाठी : ९२२६९५५४९१.