लाखोंची फी, सुरक्षा मात्र वाऱ्यावर; MIT विद्यापीठात विद्यार्थिनी 14 तास लिफ्टमध्ये अडकली
लोणी काळभोर येथील एमआयटी शैक्षणिक संकुलात विद्यार्थ्यांच्या सुरक्षेबाबत धक्कादायक घटना समोर आली आहे. वाघोली येथील १९ वर्षीय विद्यार्थिनी महाविद्यालय सुटल्यानंतर लिफ्टने खाली जात असताना अचानक वीजपुरवठा खंडित झाल्याने पाचव्या आणि सहाव्या मजल्यादरम्यान अडकली. ती एकटीच लिफ्टमध्ये होती.
एज्युवार्ता न्यूज नेटवर्क
लोणी काळभोर येथील एमआयटी शैक्षणिक संकुलात विद्यार्थ्यांच्या सुरक्षेबाबत धक्कादायक घटना समोर आली आहे. वाघोली येथील १९ वर्षीय विद्यार्थिनी महाविद्यालय सुटल्यानंतर लिफ्टने खाली जात असताना अचानक वीजपुरवठा खंडित झाल्याने पाचव्या आणि सहाव्या मजल्यादरम्यान अडकली. ती एकटीच लिफ्टमध्ये होती. दरवाजा ठोठावून आरडाओरडा केला, पण आवाज बाहेर पोहोचला नाही. मोबाइलने पालकांना संपर्क साधण्याचा प्रयत्न केला, पण फक्त ‘हॅलो’ ऐकू आल्यानंतर संपर्क तुटला आणि नंतर मोबाइल बंद झाला.
पालकांनी रात्रभर संपूर्ण परिसरात, नातेवाइकांकडे आणि इतर संभाव्य ठिकाणी शोध घेतला. मुलगी कुठेच सापडली नाही. हतबल होऊन त्यांनी मध्यरात्री लोणी काळभोर पोलीस ठाण्यात मुलगी बेपत्ता झाल्याची तक्रार दाखल केली. पोलिसांनीही शोध सुरू केला, पण ती सापडली नाही. प्रत्यक्षात ती संकुलातीलच लिफ्टमध्ये अन्नाविना, पाण्याविना आणि बाहेर पडण्याच्या मार्गांविना मृत्यूशी झुंज देत होती.

पहाटे सहाच्या सुमारास वीजपुरवठा पूर्ववत झाला. एका महिलेने लिफ्टचे बटण दाबताच लिफ्ट सुरू झाली आणि तब्बल 14 तासांनंतर विद्यार्थिनी सुखरूप बाहेर आली. पालकांना मुलगी सुरक्षित असल्याचे कळताच त्यांना दिलासा मिळाला. मात्र, या काळात झालेला मानसिक त्रास आणि रात्रभराची घालमेल याला जबाबदार कोण, असा प्रश्न उपस्थित होत आहे.
एमआयटीसारख्या नामांकित संस्थेत लाखो रुपयांची फी आकारूनही लिफ्टमध्ये आपत्कालीन अलार्म, इंटरकॉम, बॅकअप वीजपुरवठा किंवा बचाव यंत्रणा कार्यरत होती का? हे अद्याप स्पष्ट झाले नाही. सुरक्षारक्षक आणि देखभाल विभागाने 14 तास लक्षात न आणणे, याबाबत प्रशासनाकडे अनेक प्रश्न उपस्थित आहेत. विद्यार्थ्यांच्या मूलभूत सुरक्षेची हमी न देता फी घेणाऱ्या संस्थेवर विश्वास कसा ठेवायचा, अशी चर्चा पालक आणि नागरिकांमध्ये सुरू आहे.
-----------------------------------------------
सदर विद्यार्थिनी बेपत्ता झाल्याचे विद्यापीठ प्रशासनाला आणि प्राध्यापकांना समजल्यापासूनच विद्यापीठातील प्राध्यापक तसेच तिच्या वर्गाचे मेंटॉर हे सुरक्षा रक्षकांसह रात्रभर तिच्या पालकांच्या साथीने तिचा शोध घेत होते.तिचा शोध घेत असताना सर्वांनी ती सापडलेल्या इमारतीचीही रात्रीच तपासणी केली होती. मात्र, त्यावेळी ती तेथे आढळून आली नाही.दुर्दैवाने, पाच मिनिटांच्या वेळेत विद्युत पुरवठा तब्बल पाच ते सहा वेळा खंडित झाल्याने व त्यातून लिफ्टमध्ये तांत्रिक बिघाड झाल्यामुळे सदर विद्यार्थिनी लिफ्टमध्ये अडकली.या दुर्दैवी घटनेनंतर विद्यापीठ प्रशासनाने तातडीने लिफ्ट कंपनीकडे या तांत्रिक बिघाडाबाबत विचारणा केली असून, लिफ्टमधील आपत्कालीन बचाव यंत्रणा (इमर्जन्सी रेस्क्यू सिस्टीम) त्यावेळी कार्यान्वित का झाली नाही, याबाबत सविस्तर माहिती मागवली आहे.एकूणच, हा प्रकार लिफ्टमधील तांत्रिक बिघाडामुळे घडला असून, विद्यापीठ प्रशासनाने या घटनेची अत्यंत गांभीर्याने दखल घेतली आहे,असे एमआयटी प्रशासनातर्फे कळवण्यात आले आहे.