टीईटी परीक्षा जानेवारी-फेब्रुवारीत घेण्याचे नियोजन; शिक्षकांसाठी दिलासादायक बातमी

परीक्षा परिषदेतर्फे वेळोवेळी शासनाकडे टीईटी परीक्षा घेण्यासंदर्भात पत्रव्यवहार केला जातो. नुकताच पुन्हा एकदा परीक्षा परिषदेने शासनाकडे टीईटी परीक्षेबाबत पत्रव्यवहार केला आहे. परीक्षा आयबीपीएस कंपनीच्या माध्यमातून ऑनलाईन पद्धतीने घ्यावी, याबाबत चाचणी करण्यात आली.

टीईटी परीक्षा जानेवारी-फेब्रुवारीत घेण्याचे नियोजन; शिक्षकांसाठी दिलासादायक बातमी

एज्युवार्ता न्यूज नेटवर्क 

शिक्षक पात्रता परीक्षा अर्थात टीईटी परीक्षेच्या प्रतीक्षेत असणाऱ्या शिक्षकांसाठी दिलासादायक बातमी समोर आली आहे. टीईटी परीक्षेच्या पेपर फुटीनंतर महाराष्ट्र राज्य परीक्षा परिषदेने पुन्हा टीईटी परीक्षा घेण्याचे नियोजन केले असून येत्या जानेवारी किंवा फेब्रुवारी महिन्यात टीईटी परीक्षा घेण्याची तयारी केली आहे. मात्र, राज्य शासनाकडून अद्याप परीक्षा परिषदेला सकारात्मक प्रतिसाद न मिळाल्याने अधिकृत घोषणा होऊ शकली नाही. 

सर्वोच्च न्यायालयाच्या निर्णयामुळे महाराष्ट्रासह देशभरातील शिक्षकांना टीईटी परीक्षा बंधनकारक करण्यात आली. महाराष्ट्रातील सुमारे दोन लाखाहून अधिक विद्यार्थ्यांनी जून 2026 मध्ये घेतल्या जाणाऱ्या टीईटी परीक्षेसाठी नोंदणी केली. परंतु, परीक्षेच्या एक दिवसआधी टीईटी परीक्षेचा पेपर फुटल्याची धक्कादायक माहिती समोर आली. परिणामी परीक्षा परिषदेला 28 जून रोजीची टीईटी पेपर रद्द करावी लागली. त्यानंतर अधिवेशनात यावरून बराच गदारोळ झाला. शासनाने टीईटी परीक्षा ऑनलाइन पद्धतीने घेतले जाईल, अशी घोषणा केली. परंतु, या घटनेला सुमारे सहा महिन्यांचा कालावधी होत आला तरीही अद्याप टीईटी परीक्षा घेण्यासंदर्भात कोणतीही घोषणा केली गेली नाही. त्यामुळे लाखो शिक्षक टीईटी परीक्षेच्या प्रतीक्षेत आहेत. 

परीक्षा परिषदेतर्फे वेळोवेळी शासनाकडे टीईटी परीक्षा घेण्यासंदर्भात पत्रव्यवहार केला जातो. नुकताच पुन्हा एकदा परीक्षा परिषदेने शासनाकडे टीईटी परीक्षेबाबत पत्रव्यवहार केला आहे. परीक्षा आयबीपीएस कंपनीच्या माध्यमातून ऑनलाईन पद्धतीने घ्यावी, याबाबत चाचणी करण्यात आली. परंतु, वेगवेगळ्या भाषांमध्ये टीईटी परीक्षा घेणे अडचणीचे ठरत असल्याचे निदर्शनास आले आहे. मात्र त्यावर मार्ग काढून लवकरात लवकर ऑनलाइन किंवा ऑफलाइन पद्धतीने परीक्षा घेण्याबाबत परीक्षा परिषद प्रयत्नशील आहे, असे विश्वसनीय सूत्रांनी सांगितले.