विद्यार्थ्यांनो अभ्यासाचे नियोजन करा! महाराष्ट्र बोर्डाकडून २०२७ च्या दहावी-बारावी परीक्षांचे अंतिम वेळापत्रक जाहीर
महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२७ मध्ये होणाऱ्या इयत्ता दहावी आणि बारावीच्या बोर्ड परीक्षांचे अंतिम वेळापत्रक अधिकृतरीत्या प्रसिद्ध केले आहे.
एज्युवार्ता न्यूज नेटवर्क
महाराष्ट्र राज्य माध्यमिक व उच्च माध्यमिक शिक्षण मंडळाने फेब्रुवारी-मार्च २०२७ मध्ये होणाऱ्या इयत्ता दहावी आणि बारावीच्या बोर्ड परीक्षांचे अंतिम वेळापत्रक अधिकृतरीत्या प्रसिद्ध केले आहे. विद्यार्थ्यांसाठी ही अत्यंत महत्त्वाची बातमी असून लेखी परीक्षांबरोबरच प्रात्यक्षिक, तोंडी, श्रेणी आणि अंतर्गत मूल्यमापन परीक्षा यांचेही तपशीलवार नियोजन जाहीर झाले आहे. संपूर्ण वेळापत्रक मंडळाच्या अधिकृत संकेतस्थळावर http://www.mahahsscboard.in येथे उपलब्ध करून देण्यात आले आहे. यामुळे विद्यार्थ्यांना अभ्यासक्रम पूर्ण करून परीक्षा तयारीला वेळेवर सुरुवात करता येईल.
इयत्ता बारावीच्या सर्वसाधारण, द्विलक्षी व व्यवसाय अभ्यासक्रमांच्या लेखी परीक्षा सोमवार ८ फेब्रुवारी २०२७ पासून सुरू होऊन गुरुवार १८ मार्च २०२७ पर्यंत चालतील. तर इयत्ता दहावीची लेखी परीक्षा सोमवार १५ फेब्रुवारी २०२७ रोजी सुरू होईल आणि सोमवार १५ मार्च २०२७ रोजी संपेल. या कालावधीत विद्यार्थ्यांनी नियमित अभ्यासाबरोबरच वेळेचे व्यवस्थापन करणे आवश्यक आहे. बोर्डाने दिलेल्या तारखांनुसार अभ्यासक्रम पूर्ण करणे आणि सराव पत्रिकांचे निराकरण करणे फायदेशीर ठरेल.

प्रात्यक्षिक परीक्षांबाबतही स्पष्ट वेळापत्रक जाहीर झाले आहे. बारावीच्या प्रात्यक्षिक, तोंडी व श्रेणी परीक्षा बुधवार २० जानेवारी ते शनिवार ६ फेब्रुवारी २०२७ दरम्यान होतील. यामध्ये माहिती तंत्रज्ञान आणि सामान्यज्ञान विषयांचाही समावेश आहे. संगणकांची मर्यादित संख्या लक्षात घेऊन महाविद्यालयांनी या परीक्षा गटागटाने आणि दोन सत्रांत आयोजित कराव्यात, असे निर्देश देण्यात आले आहेत. दहावीच्या प्रात्यक्षिक, तोंडी, अंतर्गत मूल्यमापन तसेच शरीरशास्त्र, आरोग्यशास्त्र व गृहशास्त्र या विषयांच्या परीक्षा गुरुवार २८ जानेवारी ते शनिवार १३ फेब्रुवारी २०२७ या कालावधीत होतील.
जेईई परीक्षेतील विद्यार्थ्यांचे शैक्षणिक नुकसान टाळण्यासाठी विशेष तरतूद करण्यात आली आहे. बारावीच्या प्रात्यक्षिक कालावधीत ज्यांच्या जेईई परीक्षा येत असतील, त्यांच्या प्रात्यक्षिक परीक्षा संबंधित महाविद्यालयांनी त्याच कालावधीत इतर दिवशी आयोजित कराव्यात. वैद्यकीय किंवा अपरिहार्य कारणांमुळे नियमित कालावधीत परीक्षा देऊ न शकणाऱ्या विद्यार्थ्यांसाठी आऊट ऑफ टर्न परीक्षा व्यवस्था आहे. बारावीसाठी १२, १३ आणि १५ मार्च तर दहावीसाठी १६ ते १८ मार्च २०२७ दरम्यान या परीक्षा होतील.
दिव्यांग विद्यार्थ्यांसाठी कार्यशिक्षण विषयांच्या लेखी व प्रात्यक्षिक परीक्षा १६ ते २७ मार्च २०२७ दरम्यान दुपारच्या सत्रात शालेय स्तरावर घेतल्या जातील. यामध्ये घरगुती विद्युत उपकरणे, पाककला, चित्रकला आदी विषयांचा समावेश आहे. एकही विद्यार्थी परीक्षेपासून वंचित राहू नये, यासाठी सर्वांनी सहकार्य करावे. तसेच सर्व शाळा व महाविद्यालयांना विद्यार्थी संख्येनुसार अचूक नियोजन करून परीक्षेची माहिती वेळेवर देण्याचे आवाहन राज्य मंडळाचे सचिव डॉ. दिपक माळी यांनी केले आहे.