मोठी बातमी!प्राध्यापक भरती रखडवणाऱ्यांवर कारवाई; उच्च शिक्षण संचालक डॉ. शैलेंद्र देवळाणकरांची कुलसचिवांना तंबी
मंत्री चंद्रकांत पाटील यांच्या निर्देशानुसार बुधवारी शैलेंद्र देवळाणकर यांनी राज्यातील सर्व विद्यापीठांच्या कुलसचिवांची ऑनलाईन बैठक घेतली. तसेच भरती प्रक्रियेला गती देण्याबाबत सूचना दिल्या.
एज्युवार्ता न्यूज नेटवर्क
राज्यातील महाविद्यालयातील रखडलेल्या प्राध्यापकांच्या रिक्त जागांच्या भरती प्रक्रियेला गती देण्यासाठी उच्च शिक्षण संचालक कार्यालयाने आता पुढाकार घेतला असून बुधवारी (दि.१७) राज्यातील सर्व विद्यापीठांच्या कुलसचिवांची उच्च शिक्षण संचालक कार्यालयातर्फे ऑनलाईन बैठक घेण्यात आली. त्यात शासनाने प्राध्यापकांच्या ५०१२ पदांसाठी मंजुरी दिलेली असताना भरती प्रक्रियेला विलंब करणाऱ्या कुलसचिवांवर कारवाई करण्याचा इशारा देण्यात आला. त्यामुळे वेळवेगळी कारणे पुढे करून भरती प्रक्रिया लांबवणाऱ्या कुलसचिवांवर आता थेट कारवाई केली जाईल, अशी तंबी राज्याचे उच्च शिक्षण संचालक डॉ शैलेंद्र देवळाणकर यांनी दिली.
राज्यातील पात्रता धारक प्राध्यापकांच्या विविध प्रलंबित मागण्यावर दोन - तीन दिवसांपूर्वी राज्याच्या उच्च शिक्षण संचालक कार्यालयासमोर नेट सेट, पीएच. डी. धारक संघर्ष समितीच्या वतीने आंदोलन करण्यात आले. त्यावर संचालक डॉ.देवळाणकर यांनी आंदोलकांच्या मागण्या समजून घेतल्या. त्यानंतर मंत्रालयात राज्याचे उच्च शिक्षण मंत्री चंद्रकांत पाटील यांच्या अध्यक्षतेखाली आंदोलनाची बैठक घेण्यात आले. मंत्री चंद्रकांत पाटील यांनी आंदोलकांच्या मागण्यावर सकारात्मक निर्णय घेत समिती स्थापन केली. तसेच रखडलेली प्राध्यापक भरती सुरू करण्यासाठी शासन निर्णयाप्रमाणे विद्यापीठाने गुणांकन प्रक्रिया जाहीर करणे आवश्यक होते. मात्र, विद्यापीठांकडून याबाबत चालढकल केली जात असल्याचे समोर आले. त्यामुळे मंत्री चंद्रकांत पाटील यांच्या निर्देशानुसार बुधवारी शैलेंद्र देवळाणकर यांनी राज्यातील सर्व विद्यापीठांच्या कुलसचिवांची ऑनलाईन बैठक घेतली. तसेच भरती प्रक्रियेला गती देण्याबाबत सूचना दिल्या.
देवळाणकर म्हणाले, सर्व विद्यापीठांनी आपल्या कार्यक्षेत्रातील सर्व महाविद्यालयांमधील रिक्त पदांची भरती प्रक्रिया तात्काळ पूर्ण करावी. सर्व महाविद्यालयांच्या जाहिराती तात्काळ मंजूर कराव्यात. मंजूर केलेल्या जाहिरातींनाविद्यापीठांनी तात्काळ निवड समित्या द्याव्यात. प्राध्यापक भरतीबाबत शासनाकडून कोणत्याही बाबी प्रलंबित नाहीत. शासन आदेशानुसार सर्व विद्यापीठांनी प्राध्यापक भरती प्रक्रिया संदर्भातील गुणांकन प्रक्रिया तात्काळ जाहीर करावी. भरती प्रक्रियेस अडथळा आणणाऱ्या किंवा विनाकारण विलंब करणाऱ्या विद्यापीठाच्या अधिकाऱ्यांवर नियमानुसार कार्यवाही केली जाईल. त्यामुळे सर्व विद्यापीठांनी तात्काळ भरती प्रक्रियेला गती द्यावी.
राज्यातील विविध विद्यापीठांच्या कार्यक्षेत्रात सीएचबी म्हणून कार्यरत असणारे हजारो पात्रता धारक उमेदवार प्राध्यापक भरतीच्या प्रतीक्षेत आहेत. मात्र विद्यापीठाकडून भरती प्रक्रियेला विलंब होत असल्याचे निदर्शनास आल्यानंतर राज्याच्या उच्च शिक्षण संचालक कार्यालयाने याबाबत झाडाझडती घेतल्याच्या दिसून येत आहे. त्यामुळे प्राध्यापक पदी नियुक्ती मिळण्याचे स्वप्न पाहणाऱ्या अनेक उमेदवारांना मोठा दिलासा मिळाला आहे.