दादावाला करंडक लोकनृत्य स्पर्धेत रेणुका स्वरूप प्रशालेचा तृतीय क्रमांक
मागील वर्षी याच संस्थेच्या वतीने आयोजित लोकनृत्य स्पर्धेत रेणुका स्वरूप प्रशालेने प्रथम क्रमांक मिळवत मानाचा करंडक पटकावला होता. यंदाही विद्यार्थिनींनी आपल्या दमदार आणि आकर्षक नृत्यसादरीकरणातून स्पर्धेत उल्लेखनीय कामगिरी केली.
Eduvarta
एज्युवार्ता न्यूज नेटवर्क
दादावाला करंडक अंतर्गत आयोजित इंडियन लोकनृत्य स्पर्धेत रेणुका स्वरूप प्रशालेच्या विद्यार्थिनींनी तृतीय क्रमांक पटकावून प्रशालेच्या शिरपेचात मानाचा तुरा रोवला. या यशाबद्दल प्रशालेच्या विद्यार्थिनींना ट्रॉफी, प्रमाणपत्र आणि १५ हजार रुपयांचे रोख पारितोषिक देऊन गौरविण्यात आले.
विशेष म्हणजे, मागील वर्षी याच संस्थेच्या वतीने आयोजित लोकनृत्य स्पर्धेत रेणुका स्वरूप प्रशालेने प्रथम क्रमांक मिळवत मानाचा करंडक पटकावला होता. यंदाही विद्यार्थिनींनी आपल्या दमदार आणि आकर्षक नृत्यसादरीकरणातून स्पर्धेत उल्लेखनीय कामगिरी केली. मागील वर्षी प्रथम क्रमांक, तर यंदा तृतीय क्रमांक मिळवून विद्यार्थिनींनी आपली यशस्वी परंपरा कायम राखली आहे.
विद्यार्थिनींची मेहनत, नृत्यकलेप्रती असलेली निष्ठा, त्यांचे कलागुण तसेच शिक्षकांचे योग्य मार्गदर्शन आणि प्रशालेने दिलेले प्रोत्साहन यांमुळे हे यश संपादन करता आले. या यशामुळे प्रशालेच्या शैक्षणिक उपक्रमांसोबतच सांस्कृतिक क्षेत्रातील योगदानालाही विशेष महत्त्व प्राप्त झाले आहे.
या स्पर्धेसाठी विद्यार्थिनींना मनीषा बाजारे आणि रूपाली शितोळे यांनी मार्गदर्शन केले. विद्यार्थिनींच्या या यशाबद्दल सर्व सहभागी विद्यार्थिनी, मार्गदर्शक शिक्षक आणि सहकार्य करणाऱ्या सर्वांचे अभिनंदन करण्यात येत आहे.
