मुख्यमंत्री फेलोशिप२०२६' साठी अर्ज प्रक्रिया सुरू, विद्यार्थ्यांनी मिळणार ६१,५०० रुपये विद्यावेतन 

एज्युवार्ता न्यूज नेटवर्क 

राज्यातील तरुणांना शासकीय यंत्रणेत काम करण्याचा अनुभव मिळावा आणि त्यांच्यातील नाविन्यपूर्ण विचारांचा फायदा प्रशासनाला व्हावा, या उद्देशाने महाराष्ट्र शासनाने ‘मुख्यमंत्री फेलोशिप कार्यक्रम २०२६-२७’ (CM Fellowship 2026-27) राबविण्यास येत आहे. फेलोशिपसाठी ऑनलाईन नोंदणी सुरू (Online Registration Start) झाले असून, यासाठी २७ मे पर्यंत (Deadline May 27) ऑनलाईन अर्ज करता येणार आहे. 

मुख्यमंत्री फेलोशिप हा केवळ एक प्रशिक्षण कार्यक्रम नसून, तरुणांना थेट सरकारचा भाग होऊन लोकसेवेची संधी देणारा प्रकल्प आहे. या कार्यक्रमांतर्गत निवड झालेल्या फेलोचा दर्जा शासकीय सेवेतील 'गट-अ' अधिकाऱ्यांच्या समकक्ष ठेवण्यात आला आहे. यामुळे तरुणांना जिल्हाधिकारी कार्यालय, महानगरपालिका किंवा मंत्रालयातील विविध विभागांमध्ये थेट धोरण निर्मिती आणि अंमलबजावणीच्या प्रक्रियेत सहभागी होता येते.

पात्रता - 
यासाठी अर्जदार हा भारताचा नागरिक असावा आणि त्याचे वय २१ ते २६ वर्षांच्या दरम्यान असावे. शैक्षणिक पात्रतेसाठी कोणत्याही शाखेतील पदवीधर असणे आवश्यक असून, पदवीमध्ये किमान ६०% गुण अनिवार्य आहेत. याशिवाय, अर्जदाराकडे किमान एक वर्षाचा कामाचा अनुभव असणे आवश्यक आहे. व्यावसायिक अभ्यासक्रमांच्या विद्यार्थ्यांसाठी त्यांची इंटर्नशिप किंवा आर्टिकलशिप हा अनुभव म्हणून ग्राह्य धरला जाणार आहे. 

निवड झालेल्या उमेदवारांना १२ महिन्यांच्या कालावधीसाठी दरमहा ५६ हजार १०० रुपये मानधन आणि ५ हजार ४०० रुपये प्रवास खर्च, असे एकूण ६१ हजार५०० रुपये विद्यावेतन दिले जाणार आहे. विशेष म्हणजे या कार्यक्रमाची भागीदारी भारतीय तंत्रज्ञान संस्था बॉम्बे सोबत आहे. फेलोशिपच्या कालावधीत सर्व फेलोंना 'सार्वजनिक धोरण' या विषयातील पदव्युत्तर प्रमाणपत्र अभ्यासक्रम पूर्ण करावा लागेल.