दहावी उत्तीर्णांसाठी रेल्वेत नोकरीची मोठी संधी; २८६१ पदांसाठी अर्ज सुरू
भारतीय रेल्वेत नोकरीच्या शोधात असलेल्या तरुणांसाठी आनंदाची बातमी समोर आली आहे. रेल्वे भर्ती सेल (आरआरसी) मुंबई अंतर्गत एकूण २ हजार ८६१ अप्रेंटिस पदांसाठी भरती प्रक्रिया सुरू झाली आहे. याद्वारे विविध ट्रेडमध्ये उमेदवारांना प्रत्यक्ष रेल्वेच्या कामांचा अनुभव आणि प्रशिक्षण मिळणार आहे.
Eduvarta
एज्युवार्ता न्यूज नेटवर्क
भारतीय रेल्वेत नोकरीच्या शोधात असलेल्या तरुणांसाठी आनंदाची बातमी समोर आली आहे. रेल्वे भर्ती सेल (आरआरसी) मुंबई अंतर्गत एकूण २ हजार ८६१ अप्रेंटिस पदांसाठी भरती प्रक्रिया सुरू झाली आहे. याद्वारे विविध ट्रेडमध्ये उमेदवारांना प्रत्यक्ष रेल्वेच्या कामांचा अनुभव आणि प्रशिक्षण मिळणार आहे. इच्छुक आणि पात्र तरुणांना २ डिसेंबर २०२६ पर्यंत www.rrccr.com या अधिकृत संकेतस्थळावर ऑनलाइन अर्ज करता येईल. ही संधी विशेषतः दहावी किंवा बारावी उत्तीर्ण तरुणांसाठी खुली असणार आहे.
या भरती प्रक्रियेत सहभागी होण्यासाठी उमेदवारांनी मान्यताप्राप्त शाळेतून किमान ५० टक्के गुणांसह दहावी किंवा बारावी उत्तीर्ण केलेली असावी. तसेच नॅशनल कौन्सिल फॉर व्होकेशनल ट्रेनिंग (एनसीव्हीटी) कडून जारी केलेले नॅशनल ट्रेड सर्टिफिकेट असणे आवश्यक आहे. यासाठी किमान वय १५ वर्षे तर कमाल वय २४ वर्षे आहे. वयोमर्यादा ३ नोव्हेंबर २०२६ रोजी पर्यंत मोजली जाईल. अनुसूचित जाती आणि जमातीच्या उमेदवारांना ५ वर्षांची तर इतर मागासवर्गीय उमेदवारांना ३ वर्षांची वयोमर्यादा सूट मिळेल. निवड झालेल्या उमेदवारांना दरमहा ९ हजार ६०० रुपये स्टायपेंड मिळणार आहे. या प्रशिक्षणातून रेल्वेच्या विविध कामांचा प्रत्यक्ष अनुभव घेता येईल.
अर्ज करताना सर्व शैक्षणिक प्रमाणपत्रे, जात प्रमाणपत्र (असल्यास), आधार कार्ड, पासपोर्ट आकाराचे फोटो आणि इतर आवश्यक कागदपत्रे तयार ठेवावीत. ऑनलाइन अर्ज प्रक्रिया सोपी आहे. प्रथम आरआरसी मुंबईच्या अधिकृत वेबसाइटला भेट द्या. होमपेजवर आरआरसी मुंबई अप्रेंटिस २०२६ ची लिंक शोधा आणि त्यावर क्लिक करा. अर्जामध्ये मागितलेली सर्व माहिती काळजीपूर्वक आणि अचूक भरा. आवश्यक कागदपत्रे अपलोड करून निर्धारित अर्ज शुल्क भरा. अर्ज यशस्वीरीत्या सबमिट केल्यानंतर त्याची प्रिंट काढून स्वतःजवळ ठेवा.
ही भरती रेल्वेमध्ये करिअर सुरू करू इच्छिणाऱ्या तरुणांसाठी महत्त्वाची संधी आहे. उमेदवारांनी वेळेच्या आत अर्ज करावा, असे आवाहन करण्यात आले आहे. अधिक अचूक आणि अद्ययावत माहितीसाठी अधिकृत संकेतस्थळावर नियमितपणे भेट द्या, असे सांगण्यात आले आहे.
