टॉपर' निघाले कॉपी बहाद्दर! तब्बल ४० जणांवर कारवाई; IBPS परीक्षा पद्धतीवर प्रश्नचिन्ह

छञपती संभाजीनगर  महापालिकेच्या विविध पदांसाठी शासनमान्य आयबीपीएस एजन्सीमार्फत घेण्यात आलेल्या परीक्षेत मोठ्या प्रमाणात गडबड झाल्याचे उघड झाले आहे.

टॉपर' निघाले कॉपी बहाद्दर! तब्बल ४० जणांवर कारवाई; IBPS परीक्षा पद्धतीवर प्रश्नचिन्ह

एज्युवार्ता न्यूज नेटवर्क

छञपती संभाजीनगर  महापालिकेच्या विविध पदांसाठी शासनमान्य आयबीपीएस एजन्सीमार्फत घेण्यात आलेल्या परीक्षेत मोठ्या प्रमाणात गडबड झाल्याचे उघड झाले आहे. कॉपी करून दोन उमेदवार टॉपर बनले होते, तर एकूण ३५ ते ४० जणांनी विविध प्रकारच्या अनियमितता केल्या. या सर्वांना बाद करण्यात आल्याची माहिती आयुक्त अमोल येडगे यांनी दिली. यामुळे परीक्षेच्या पारदर्शकतेबाबत प्रश्न उपस्थित झाले आहेत.

महापालिकेत रिक्त पदे वाढत असल्याने टप्प्याटप्प्याने भरती प्रक्रिया सुरू आहे. अग्निशामक, कनिष्ठ अभियंता, चालक-यंत्रचालक, रोखपाल, स्वच्छता निरीक्षक आदी एकूण २२२ पदांसाठी परीक्षा आयोजित करण्यात आली होती. यासाठी सुमारे ४० हजार बेरोजगार युवकांनी अर्ज केले होते. आयबीपीएसने ८ आणि ९ जुलै रोजी ऑनलाइन परीक्षा घेतली.

यातील आठ संवर्गांचे निकाल आतापर्यंत जाहीर झाले असून उर्वरित तीन संवर्गांचे निकाल लवकरच प्रसिद्ध होणार आहेत. अग्निशामक, रोखपाल आणि संबंधित काही पदांचे निकाल कंपनीने जाहीर केले आहेत. मात्र कनिष्ठ अभियंता आणि चालक-यंत्रचालक यांसारख्या संवर्गांचे निकाल अद्याप प्रलंबित आहेत. परीक्षाप्रक्रियेत गडबड आढळल्याने कंपनीने महापालिकेला अहवाल सादर केला.

विशेष म्हणजे सहायक पशुधन पर्यवेक्षक आणि अग्निशामक पदासाठी दोन उमेदवार टॉपर ठरले होते. सीसीटीव्ही फुटेजनुसार त्यांनी परीक्षेच्या शेवटच्या पाच ते दहा मिनिटांत उत्तरपत्रिकेवर घाईघाईने टीकमार्क केल्याचे दिसून आले. त्यांना पाचारण करून तोंडी परीक्षा घेण्यात आली, मात्र त्यांना दहावीचे गुणही नीट सांगता आले नाहीत. त्यानंतर स्वतंत्र लेखी परीक्षा घेतल्यास दोघेही नापास झाले आणि त्यांना बाद करण्यात आले.

आयुक्त अमोल येडगे यांनी स्पष्ट केले की, आयबीपीएसच्या अहवालानुसार सर्व दोषी उमेदवारांना निकालातून वगळण्यात आले आहे. महापालिका पारदर्शक भरती प्रक्रिया सुनिश्चित करण्यासाठी कठोर पावले उचलत आहे. उर्वरित निकाल लवकरच जाहीर होतील आणि योग्य उमेदवारांचीच निवड होईल, असे त्यांनी सांगितले.