पदवीधरांसाठी बँकेत नोकरीची मोठी संधी! इंडियन बँकेत 1500 पदांसाठी भरती सुरू
बँकिंग क्षेत्रात करिअर घडवण्याची इच्छा असलेल्या पदवीधरांसाठी आनंदाची बातमी आहे. इंडियन बँकेने आर्थिक वर्ष २०२६-२७ साठी देशभरात एकूण १५०० अप्रेंटिस पदांच्या भरतीची अधिसूचना जाहीर केली आहे. ही भरती अप्रेंटिसशिप कायदा १९६१ अंतर्गत राबवली जात असून अर्ज प्रक्रिया सुरू झाली आहे.
Eduvarta
एज्युवार्ता न्यूज नेटवर्क
बँकिंग क्षेत्रात करिअर घडवण्याची इच्छा असलेल्या पदवीधरांसाठी आनंदाची बातमी आहे. इंडियन बँकेने आर्थिक वर्ष २०२६-२७ साठी देशभरात एकूण १५०० अप्रेंटिस पदांच्या भरतीची अधिसूचना जाहीर केली आहे. ही भरती अप्रेंटिसशिप कायदा १९६१ अंतर्गत राबवली जात असून अर्ज प्रक्रिया सुरू झाली आहे. इच्छुक उमेदवारांना २५ नोव्हेंबर २०२६ पर्यंत ऑनलाइन अर्ज करता येईल.
या मोहिमेअंतर्गत देशातील ३० राज्ये आणि केंद्रशासित प्रदेशांमध्ये पदे उपलब्ध आहेत. उत्तर प्रदेशात सर्वाधिक २८५, तामिळनाडूमध्ये २७०, पश्चिम बंगालमध्ये १४५, आंध्र प्रदेशात ८५, बिहारमध्ये ८०, महाराष्ट्रात ७०, मध्य प्रदेशात ६५ आणि झारखंडमध्ये ६० अशी पदे जाहीर करण्यात आली आहेत. इतर राज्यांमध्येही काही पदे राखीव ठेवण्यात आली आहेत.
पात्रतेसाठी उमेदवाराकडे मान्यताप्राप्त विद्यापीठाची कोणतीही पदवी असणे आवश्यक आहे. ही पदवी १ एप्रिल २०२२ ते १ नोव्हेंबर २०२६ या कालावधीत पूर्ण झालेली असावी आणि निकाल १ नोव्हेंबर २०२६ किंवा त्यापूर्वी जाहीर झालेला असावा. १ नोव्हेंबर २०२६ रोजी उमेदवाराचे वय २० ते २८ वर्षांच्या दरम्यान असावे. राखीव प्रवर्गातील उमेदवारांना नियमानुसार वयोमर्यादेत सवलत मिळेल.
निवड झालेल्या उमेदवारांना १२ महिन्यांचे ऑन-द-जॉब प्रशिक्षण दिले जाईल. मेट्रो आणि शहरी शाखांमध्ये प्रशिक्षण घेणाऱ्यांना दरमहा १५ हजार रुपये, तर ग्रामीण व निमशहरी भागातील शाखांमध्ये प्रशिक्षण घेणाऱ्यांना दरमहा १२ हजार ३०० रुपये विद्यावेतन मिळेल.
अर्ज करण्यासाठी सर्वप्रथम NATS २.० पोर्टलवर प्रोफाइल पूर्ण करून एनरोलमेंट आयडी मिळवावा. त्यानंतर indianbank.bank.in या अधिकृत वेबसाइटवर ‘करिअर’ विभागात जाऊन ‘Engagement of Apprentices in Indian Bank २०२६’ लिंकवर क्लिक करावे. वैयक्तिक, शैक्षणिक व राज्य-जिल्हा माहिती भरून कागदपत्रे अपलोड करावीत, अर्ज शुल्क भरावे आणि फॉर्म सबमिट करून प्रिंट काढून ठेवावी.
