दहावी-बारावी पुरवणी परीक्षेची प्रवेशपत्र ऑनलाईन मिळणार; शाळांवर सोपवली जबाबदारी
विद्यार्थ्यांना पाच जुलैपासून प्रवेशपत्र मिळणार आहे. प्रवेशपत्राबाबत मंडळाकडून सर्व शाळांना सुचना देण्यात आल्या आहेत. शाळांनीच विद्यार्थ्यांना प्रवेशपत्राची प्रिंट काढून द्यायची आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य माध्यमिक व उच्च माध्यमिक शिक्षण मंडळमार्फत (SSC Board) घेण्यात येणाऱ्या इयत्ता दहावी व बारावीच्या पुरवणी परीक्षेची प्रवेशपत्र (Hall Ticket) ऑनलाईन मिळणार आहे. परीक्षा अर्ज भरलेल्या विद्यार्थ्यांना संबंधित शाळा व कनिष्ठ महाविद्यालयांमध्ये प्रवेशपत्र दिले जाणार असल्याची माहिती मंडळाच्या सचिव अनुराधा ओक यांनी दिली. (HSC, SSC Supplementary Exam)
विद्यार्थ्यांना पाच जुलैपासून प्रवेशपत्र मिळणार आहे. प्रवेशपत्राबाबत मंडळाकडून सर्व शाळांना सुचना देण्यात आल्या आहेत. शाळांनीच विद्यार्थ्यांना प्रवेशपत्राची प्रिंट काढून द्यायची आहे. प्रवेशपत्र ऑनलाईन पध्दतीने प्रिंटींग करताना विद्यार्थ्यांकडून त्यासाठी कोणतेही वेगळे शुल्क घेऊ नये, असे मंडळाकडून स्पष्ट करण्यात आले आहे. प्रवेशपत्राची प्रिंट काढून त्यावर मुख्याध्यापकांचा किंवा प्राचार्यांचा शिक्का आणि स्वाक्षरी असल्याशिवाय ते ग्राह्य धरले जाणार नाही.
इयत्ता अकरावीची दुसरी निवड यादी जाहीर; प्रवेश निश्चित करण्यासाठी महत्वाच्या टीप्स
प्रवेशपत्रामध्ये विषय व माध्यम बदल असतील तर त्यांच्या दुरुस्त्या माध्यमिक शाळा / कनिष्ठ महाविद्यालयांनी विभागीय मंडळात समक्ष जाऊन करून घ्यावयाच्या आहेत. प्रवेशपत्रावरील फोटो, स्वाक्षरी, विद्यार्थ्याचे नाव या संदर्भातील दुरुस्त्याही विभागीय मंडळस्तरावरून होणार आहेत. त्यासाठी शाळांनाच विभागीय मंडळाशी संपर्क साधावा लागणार आहे.
प्रवेशपत्र विद्यार्थ्यांकडून गहाळ झाल्यास संबंधित माध्यमिक शाळा/ कनिष्ठ महाविद्यालयांनी पुन्हा प्रिंट काढून त्यावर लाल शाईने व्दितीय प्रत (Duplicate) असा शेरा देऊन विद्यार्थ्यांना प्रवेशपत्र द्यायचे आहे. फोटो सदोष असल्यास त्यावर विद्यार्थ्याचा फोटो चिकटवून त्यावर संबंधित मुख्याध्यापक / प्राचार्य यांनी शिक्का उमटवून स्वाक्षरी करावयाची आहे, असेही मंडळाकडून स्पष्ट करण्यात आले आहे.
प्रवेशपत्रासाठी मंडळाचे संकेतस्थळ : www.mahahsscboard.in
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
