यवतमाळ आयुर्वेदिक महाविद्यालय रॅगिंग प्रकरणी, प्रशासनाची१८ विद्यार्थ्यांवर कारवाई

एज्युवार्ता न्यूज नेटवर्क 

यवतमाळ येथील डायाभाई मावजी मजीठीया आयुर्वेदिक महाविद्यालय (Ayurvedic College, Yavatmal) येथे रॅगिंग प्रकरण (Ragging Incident) उघडकीस आल्यानंतर महाविद्यालय प्रशासनाने कठोर भूमिका घेत १८ विद्यार्थ्यांवर कारवाई (Action Taken Against 18 Students) करण्याचा निर्णय घेतला आहे. ही कारवाई UGC रॅगिंग-विरोधी हेल्पलाइनवर (UGC Anti-Ragging Helpline) करण्यात आलेल्या तक्रारीनंतर करण्यात आली आहे.

मिळालेल्या माहितीनुसार, बीएएमएस प्रथम वर्षात नव्याने प्रवेश घेतलेल्या विद्यार्थ्यांकडून वरिष्ठ विद्यार्थ्यांकडून रॅगिंग केली जात असल्याची तक्रार करण्यात आली होती. या तक्रारीत सुमारे २१ विद्यार्थ्यांनी रॅगिंग झाल्याचे नमूद केले होते. रॅगिंगमध्ये शिवीगाळ करणे, वैयक्तिक कामे करून घेणे, लिखाण करून आणण्यास भाग पाडणे तसेच रूमवर बोलावून त्रास देणे असे प्रकार घडत असल्याचा आरोप करण्यात आला होता.

तक्रार प्राप्त होताच यूजीसी अँटी रॅगिंग हेल्पलाइन आणि स्थानिक अवधूतवाडी पोलीस ठाणे यांच्या वतीने महाविद्यालय प्रशासनाला चौकशीचे निर्देश देण्यात आले. त्यानुसार महाविद्यालयातील अँटी-रॅगिंग समितीची बैठक बोलावण्यात आली आणि सखोल चौकशी करण्यात आली. चौकशी अहवालात रॅगिंगचे प्रकार स्पष्ट झाल्यानंतर समितीने संबंधित विद्यार्थ्यांवर कारवाई निश्चित केली. 

यामध्ये एका विद्यार्थ्याची एका वर्षासाठी महाविद्यालयातून हकालपट्टी करण्याचा निर्णय घेण्यात आला आहे. तसेच आठ विद्यार्थ्यांना सहा महिन्यांसाठी निलंबित करण्यात येणार असून उर्वरित आठ विद्यार्थ्यांवर दंडात्मक कारवाई प्रस्तावित करण्यात आली आहे. रॅगिंगसारख्या गंभीर प्रकारांना अजिबात सहन केले जाणार नाही. विद्यार्थ्यांनी अशा प्रकारांपासून दूर राहावे आणि शैक्षणिक वातावरण सुरक्षित ठेवण्यासाठी सहकार्य करावे, असे आवाहन महाविद्यालय प्रशासनाने या कारवाईनंतर केले आहे.