रायगड जिल्ह्यात पहिले शासकिय युनानी महाविद्यालय; वैद्यकीय शिक्षण विभागाचे पत्रक प्रसिध्द

एज्युवार्ता न्यूज नेटवर्क 

कोरोनानंतर आरोग्य क्षेत्रात विविध नवीन गोष्टी सुरू करण्यात येत आहेत. काही महिन्यांपूर्वीच केंद्र सरकारने राज्यातील एमबीबीएस अभ्यासक्रमासाठी (MBBS course) महाविद्यालयांच्या संख्येत वाढ केली आहे. त्यानंतर आता आयुष विभागाच्या अखत्यारीत येणार्‍या युनानी पॅथीचे राज्य शासनाचे पहिले शासकिय महाविद्यालय (Unani Pathi Government College) रायगड जिल्ह्यातील म्हसळा तालुक्यात सुरू करण्याचा निर्णय घेण्यात आला आहे. त्यासाठी वैद्यकीय शिक्षण विभागाने (Department of Medical Education) परवानगी दिल्याचे प्रसिद्धीपत्रक प्रसिद्ध करण्यात आले आहे. 

सध्या राज्यात युनानी पदवी अभ्यासक्रमाची तीन अनुदानित आणि चार खासगी विनानुदानित अशी एकूण सात महाविद्यालये आहेत. या सर्वांची मिळून एकूण विद्यार्थी प्रवेश क्षमता ४२० एवढी आहे. प्रत्येक वर्षी राज्यात प्रवेश घेणारे विद्यार्थी हजारो असतात.मात्र प्रवेश क्षमता शेकड्यात असल्याने अनेकांची निराशा होते. त्याचा विचार करून राज्य सरकारने पहिले शासकिय युनानी महाविद्यालय सुरू करण्याचा निर्णय घेतला आहे. 

राज्य शासनाचे स्वतःचे एकही युनानी महाविद्यालय नसल्याने १०० विद्यार्थी प्रवेश क्षमतेचे नवीन शासकिय युनानी कॉलेज आणि संलग्न १०० रूग्ण बेड्सचे रुग्णालय सुरू करण्यास मंत्रिमंडळाने मंजूरी दिली होती. त्यानंतर आता वैद्यकीय शिक्षण विभागाने देखील परवानगी दिल्याने अखेर मार्ग मोकळा झाला आहे. 

भारतीय चिकित्सा केंद्रीय परिषदेच्या मानांकनानुसार नवीन युनानी कॉलेज सुरू करण्यासाठी तेथे एक वर्षापासून रुग्णालय कार्यरत असणे आवश्यक आहे. युनानी कॉलेज सुरू करण्याकरिता रायगड जिल्ह्यातील म्हसळा येथील शासकिय रुग्णालय तात्पुरत्या स्वरुपात ३ वर्षांसाठी वापरण्यास वैद्यकीय शिक्षण विभागाने मान्यता दिली आहे. यामुळे नवे युनानी कॉलेज सुरू होण्याचा मार्ग मोकळा झाला आहे.