दुकानाला चाललेल्या शाळकरी मुलाचा मांजा दोऱ्याने चिरला गळा 

एज्युवार्ता न्यूज नेटवर्क 

मकर संक्रात (Makar Sankranti) काही दिवसांवर आली असतानच चंद्रपूर मधून धक्कादायक घटना समोर आली आहे. घरून सायकलवर दुकानाला जात असलेल्या तिसरीत शिकणाऱ्या नऊ वर्षाच्या  शाळकरी मुलाचा मांजाने गळा चिरला (Schoolboy's throat slit) आहे. गळा कापल्यानंतर त्या विद्यार्थ्याला ताबडतोब जवळच्या रुग्णालयात दाखल करण्यात आले. डॉक्टरांनी कोणताही विलंब न करता त्वरित उपचार केल्याने सुदैवाने मुलाचा जीव वाचला. चंद्रपूरच्या वृंदावनगर (Chandrapur Vrindavna) परिसरात ही दुर्दैवी घडली. 

मांजाने जखमी झालेल्या विद्यार्थ्याचे नाव साई जंपलवार असे आहे. या घटनेमुळे 'नायलॉन मांजा'चा मुद्दा पुन्हा एकदा ऐरणीवर आला आहे. साई जंपलवार हा वृंदावननगर येथील रहिवासी असून, लोकमान्य टिळक ज्ञान मंदिर या शाळेत इयत्ता तिसरीच्या वर्गात शिक्षण घेतो. रविवारी सकाळच्या सुमारास तो सायकलने किराणा दुकानाला जाण्यासाठी निघाला. काही अंतरावरच अचानक नायलॉन मांजा त्याच्या मानेला चिरून गेला. अचानक गळा कापल्याने त्याला काही सुचेनासे झाले. तो जागीच पडला, त्यानंतर शेजार्‍यांनी त्याच्या घरी कळवले, घरचे धावत आले आणि त्यांनी त्याला त्वरित रुग्णालयात दाखल केले. 

यानिमित्ताने नायलाॅन मांजा विकण्यास बंदी असताना तो कोणी विकला आणि कोणी घेतला.  दुसऱ्या साईवर अशी वेळ येण्यापूर्वी हा अपघात कोणामुळे घडला हे उजाडात येणे अपेक्षित आहे. लहानशा चिमुकल्या विद्यार्थ्यांची काही चूक नसतानाही नाहक त्याचा गळा चिरला. यामुळे त्याला गंभीर दुखापत झाली. यावरून मांजा किती घातक आहे, हे कळते. ही घटना थोडक्यात निभावली असली तरी याकडे दुर्लक्ष करून चालणार नाही. नायलॉन मांजा विकणाऱ्यांवर, या मांजाची पगंत उजविणाऱ्यांवर कारवाई होणे गरजेचे आहे. अन्यथा या विद्यार्थ्यांसह आपल्यावरही अशीच वेळ येऊ शकते.