पुणे महापालिका कनिष्ठ अभियंता परीक्षा पेपरफुटी; 'टीसीएस'च्या २ कर्मचाऱ्यांसह ३ विद्यार्थ्यांना अटक
पुणे महानगरपालिकेच्या कनिष्ठ अभियंता पदासाठी झालेल्या भरती परीक्षेत पेपरफुटी झाल्याचे गंभीर प्रकरण समोर आले आहे. तीन दिवसांपूर्वी उघड झालेल्या या घोटाळ्यात पोलिसांनी सहा जणांविरुद्ध गुन्हा दाखल केला आहे. यात तीन विद्यार्थी, टीसीएस कंपनीचे दोन कर्मचारी आणि एक अज्ञात व्यक्ती यांचा समावेश आहे.
Eduvarta
एज्युवार्ता न्यूज नेटवर्क
पुणे महानगरपालिकेच्या कनिष्ठ अभियंता पदासाठी झालेल्या भरती परीक्षेत पेपरफुटी झाल्याचे गंभीर प्रकरण समोर आले आहे. तीन दिवसांपूर्वी उघड झालेल्या या घोटाळ्यात पोलिसांनी सहा जणांविरुद्ध गुन्हा दाखल केला आहे. यात तीन विद्यार्थी, टीसीएस कंपनीचे दोन कर्मचारी आणि एक अज्ञात व्यक्ती यांचा समावेश आहे. छत्रपती संभाजीनगर येथील परीक्षा केंद्रावर चष्म्यात छुपा कॅमेरा बसवून प्रश्नपत्रिका बाहेर पाठवण्याचा हा हायटेक कॉपीचा प्रकार सीसीटीव्ही फुटेज आणि फॉरेन्सिक तपासातून समोर आला.
या प्रकरणात गजानन पाचे, शिवशंकर शेळगावे आणि विष्णूकांत वाघमारे या तीन विद्यार्थ्यांनी चष्म्यातील स्पाय कॅमेऱ्याच्या मदतीने प्रश्न बाहेर पाठवले. त्यांना टीसीएसचे कर्मचारी योगेश राठोड आणि विकास गायकवाड यांनी मदत केली. मुंबई, नागपूर, अमरावती, कोल्हापूर आणि छत्रपती संभाजीनगर येथील विविध केंद्रावर परीक्षा झाली होती. मात्र गैरप्रकार फक्त संभाजीनगरच्या आयकॉन डिजिटल झोन चिखलठाणा केंद्रावर घडला. या तिघांनाही ९० गुणांपेक्षा अधिक गुण मिळाले आणि त्यांची निवड कनिष्ठ अभियंता पदासाठी झाली.
हा गैरव्यवहार तांत्रिक तपासातून उघड झाला. त्यासाठी एकूण २० हजार ७३५ उमेदवारांच्या ऑनलाइन लॉगशीटचा सखोल अभ्यास करण्यात आला. यामध्ये संबंधित तीन उमेदवारांची उत्तरे सोडवण्याची पद्धत अत्यंत संशयास्पद आढळली. पहिला अर्धा तास त्यांनी फक्त स्क्रीनवरील प्रश्न वाचले आणि नंतर स्वच्छतागृहात गेले. परत आल्यानंतर शेवटच्या अर्ध्या तासात त्यांनी वेगाने १०० प्रश्न सोडवले आणि त्यातील ९० पेक्षा जास्त उत्तरे अचूक ठरली. सलग दीड महिन्याच्या फॉरेन्सिक तपासाअंती हा प्रकार उघडकीस आला.
पोलिसांनी या सहा जणांविरुद्ध गुन्हा दाखल करून चौकशी सुरू केली आहे. परीक्षा केंद्रांवरील सीसीटीव्ही फुटेज आणि चष्म्यातील कॅमेऱ्याच्या वापराचे पुरावे मिळाले आहेत. या घटनेने भरती प्रक्रियेतील सुरक्षा व्यवस्थेबाबत प्रश्न उपस्थित झाले आहेत. अनेक केंद्रावर परीक्षा झाली असताना केवळ एका केंद्रावर असा प्रकार घडल्याने प्रशासनासमोर आव्हान निर्माण झाले आहे.
पुणे महापालिका प्रशासनाने मात्र परीक्षा रद्द करण्यास नकार दिला आहे. केवळ तीन विद्यार्थ्यांनी गैरप्रकार केला असल्याने संपूर्ण परीक्षा रद्द करता येणार नाही, अशी भूमिका घेतली आहे. या निर्णयावर टीका होत असली तरी प्रशासनाने निवड प्रक्रिया सुरू ठेवण्याचे ठरवले आहे.
_____________________________
पुणे मनपा कनिष्ठ अभियंता पदाच्या भरती परीक्षेत गैरप्रकार झाल्याचं सिद्ध झालं आहे. ही परीक्षा रद्द करुन नव्याने परीक्षा घेण्याच्या मागणीसाठी आजही अनेक विद्यार्थी हे महापालिकेसमोर आंदोलन करत आहेत. प्रशासनाने त्यांच्या मागणीची दखल घेऊन ही परीक्षा आणि दिलेल्या नियुक्त्या रद्द कराव्यात, अन्यथा विद्यार्थ्यांचा हा लढा अधिक तीव्र होईल आणि आमचाही त्यांच्या या लढ्याला पाठींबा असेल.
- रोहित पवार, आमदार
