एमपीएससी पेपरफुटी प्रकरणात मोठी कारवाई; आयोगाच्या अपर सचिवांसह अनेक जणांना अटक
MPSC औषध निरीक्षक (Drug Inspector) परीक्षा पेपरफुटी प्रकरण: वरिष्ठ अधिकाऱ्यांना अटक; या तपासामुळे महाराष्ट्राच्या परीक्षा पद्धतीवर गंभीर प्रश्नचिन्ह निर्माण झाले आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाच्या (एमपीएससी) औषध निरीक्षक गट-ब पदाच्या पेपरफुटी प्रकरणात गुन्हे शाखेने मोठी कारवाई केली आहे. आयोगाचे अपर सचिव अभिजीत लेंडवे यांना थेट अटक करण्यात आल्याने संपूर्ण राज्यात खळबळ उडाली आहे. देशभरात आणि महाराष्ट्रात पेपरफुटीची सत्रे सुरू असताना शिक्षकांच्या परीक्षेनंतर आता एमपीएससीच्या नाकालाही छेद बसला आहे. इतक्या उच्चपदावरील अधिकाऱ्याला अटक झाल्याने हे प्रकरण एका मोठ्या रॅकेटचा भाग असल्याची शक्यता व्यक्त केली जात आहे. परीक्षा घेणाऱ्या संस्थेतील अधिकाऱ्यांमध्येच भ्रष्टाचार असल्याचे या निमित्ताने पुन्हा एकदा समोर आले आहे.
या प्रकरणात अपर सचिवांसोबत दोन सहायक कक्ष अधिकारी गोपाळ मराठे आणि विश्वेश्वर नकाते यांनाही अटक करण्यात आली आहे. परीक्षार्थी ऋतुजा पाटील, तिचे वडील अमृत पाटील आणि पेपरफुटीतील सूत्रधार अमृत पाटील यांनाही ताब्यात घेण्यात आले आहे. गौरव पाटील यांनी पेपर फुटल्याचा आरोप केला असला तरी त्यांची भूमिका संशयास्पद असल्याने अद्याप त्यांना अटक झालेली नाही. प्रेमप्रकरणातून पेपर फुटल्याचा दावा केला जात असला तरी आमदार रोहित पवार यांनी हा पेपर ४० लाख रुपयांना विक्री केल्याचा गंभीर आरोप केला आहे. त्यामुळे हा केवळ एका प्रकरणापुरता मर्यादित नसून मोठ्या घोटाळ्याचा भाग असल्याचे स्पष्ट होत आहे.
या घोटाळ्यामुळे विरोधकांनी तीव्र संताप व्यक्त केला असून दोषींवर कठोर कारवाई करण्याची मागणी लावून धरली आहे. हजारो उमेदवारांचे मनोबल खचले असून परीक्षा प्रक्रियेवरील विश्वास ढासळला आहे. अन्न व औषध प्रशासनातील औषध निरीक्षक पदासाठी एमपीएससीने भरती प्रक्रिया राबवली होती. २२ मार्च २०२६ रोजी राज्यातील सहा विभागीय मुख्यालयांच्या परीक्षा केंद्रांवर ऑफलाइन पद्धतीने चाळणी परीक्षा घेण्यात आली होती. १२ जून रोजी निकाल जाहीर झाला आणि मुलाखतीसाठी ५०६ उमेदवार पात्र ठरले. त्यापैकी ४८८ जणांच्या मुलाखती १ ते २२ जुलैदरम्यान झाल्या. त्यानंतर ४८५ पात्र आणि ३ अपात्र अशा एकूण ४८८ उमेदवारांची तात्पुरती गुणवत्ता यादी आयोगाच्या संकेतस्थळावर प्रसिद्ध करण्यात आली होती.
या अटकमोहिमेनंतर पेपरफुटीच्या तपासात आणखी मोठे खुलासे होण्याची शक्यता आहे. उच्चपदस्थ अधिकाऱ्यांचा सहभाग समोर आल्याने संपूर्ण परीक्षा यंत्रणेवर प्रश्नचिन्ह निर्माण झाले आहे. उमेदवारांच्या भवितव्याशी खेळणाऱ्या या प्रकारावर कडक कारवाई होणे आवश्यक आहे, अशी मागणी सर्वत्र होत आहे.
