पुणे शिक्षक मतदारसंघातून एकनाथ शिंदेंचे विश्वासू निवडणूकीच्या मैदानात
महाराष्ट्रात निवडणुकीच्या तयारीने वेग घेतला असताना, मंगेश चिवटे यांनी शिक्षक संघटनेच्या पाठिंब्याने पुणे शिक्षक मतदारसंघासाठी आपली उमेदवारी जाहीर केली आहे.
Eduvarta
एज्युवार्ता न्यूज नेटवर्क
उपमुख्यमंत्री एकनाथ शिंदे यांचे जवळचे सहयोगी आणि विश्वासू शिलेदार मंगेश चिवटे पुणे शिक्षक परिषद मतदारसंघातून निवडणुकीच्या मैदानात उतरणार आहेत. शिंदे मुख्यमंत्री असताना त्यांचे ओएसडी म्हणून काम पाहणारे तसेच सध्या शिवसेना वैद्यकीय मदत कक्ष प्रमुख म्हणून कार्यरत असणारे चिवटे यांनी आपल्या उमेदवारीची घोषणा पत्रकार परिषदेत केली. नोव्हेंबर महिन्यात होण्याची शक्यता असलेल्या या निवडणुकीसाठी इच्छुक उमेदवारांच्या तयारीला आता वेग आला आहे.
सहा सप्टेंबर रोजी मुख्याध्यापक, शिक्षक आणि शिक्षकेतर कर्मचाऱ्यांचा मेळावा आयोजित करण्यात आला आहे. त्याच दिवशी चिवटे यांचा प्रचार अधिकृतपणे सुरू होणार आहे. या मेळाव्यात महायुतीचे खासदार, मंत्री आणि आमदार उपस्थित राहणार असून प्रचाराचा शुभारंभ होणार असल्याची माहिती त्यांनी दिली. चिवटे यांनी आपली उमेदवारी निश्चित करण्यासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार यांची भेट घेतली होती. तिन्ही नेते त्यांच्या उमेदवारीबाबत सकारात्मक असल्याचे त्यांनी सांगितले.
याच दरम्यान महाराष्ट्र शिक्षक लोकशाही आघाडीकडून स्वामी विवेकानंद शिक्षण संस्थेचे कार्यकारी अध्यक्ष कौस्तुभ गावडे यांनाही उमेदवारी मिळाली आहे. एकनाथ स्वाभिमानी शिक्षक सेनेने मात्र मंगेश चिवटे यांना पाठिंबा दिला असून संघटनेचे प्रदेशाध्यक्ष प्रा. डॉ. बापूसाहेब अडसूळ यांनी त्यांची उमेदवारी जाहीर केली. या संघटनेचे राज्यात सुमारे २३ हजार शिक्षक सदस्य आहेत, त्यापैकी पुणे मतदारसंघातच १५ हजार सदस्य असल्याची माहिती अडसूळ यांनी दिली.
पुणे शिक्षक मतदारसंघातील निवडणूक महत्त्वाची ठरणार असल्याने विविध संघटना आणि नेते आत्तापासूनच सक्रिय झाले आहेत. चिवटे यांच्या उमेदवारीमुळे शिंदे गटाचा प्रभाव या मतदारसंघात वाढण्याची शक्यता व्यक्त होत आहे. सहा सप्टेंबरच्या मेळाव्यानंतर प्रचाराला अधिक गती येईल आणि नोव्हेंबरमध्ये होणाऱ्या निवडणुकीत कोण विजयी होईल, याकडे सर्वांचे लक्ष लागले आहे.
