सीईटीचा मोठा निर्णय : संस्थास्तरीय प्रवेशात व्हिडिओ रेकॉर्डिंग बंधनकारक; नियम मोडल्यास कठोर कारवाई
पारदर्शकता आणि निष्पक्षता राखण्यासाठी सीईटी कक्षाने महत्त्वपूर्ण उपाययोजना जाहीर केल्या आहेत. संस्थास्तरीय प्रवेश प्रक्रियेत व्हिडिओ रेकॉर्डिंग आता बंधनकारक करण्यात आले आहे. तसेच संस्था, विद्यार्थी आणि पालकांसाठी विशेष परिपत्रक प्रसिद्ध करण्यात आले असून त्यात सर्व सूचना देण्यात आल्या आहेत.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा कक्षातर्फे शैक्षणिक वर्ष २०२६-२७ साठी तंत्रशिक्षण अभ्यासक्रमांच्या केंद्रीभूत प्रवेश फेऱ्या सुरू आहेत. या फेऱ्या संपल्यानंतर संस्थास्तरीय प्रवेश प्रक्रिया सुरू होणार आहे. पारदर्शकता आणि निष्पक्षता राखण्यासाठी सीईटी कक्षाने महत्त्वपूर्ण उपाययोजना जाहीर केल्या आहेत. संस्थास्तरीय प्रवेश प्रक्रियेत व्हिडिओ रेकॉर्डिंग आता बंधनकारक करण्यात आले आहे. तसेच संस्था, विद्यार्थी आणि पालकांसाठी विशेष परिपत्रक प्रसिद्ध करण्यात आले असून त्यात सर्व सूचना देण्यात आल्या आहेत. यामुळे प्रवेश प्रक्रियेतील अनियमितता रोखण्याचा प्रयत्न केला जात असल्याचे सांगण्यात आले आहे.
निवडक खाजगी महाविद्यालयांमध्ये नजीकच्या शासकीय महाविद्यालयातील प्राचार्य, संचालक किंवा वरिष्ठ प्राध्यापकांची निरीक्षक म्हणून नियुक्ती केली जाईल. हे निरीक्षक कागदपत्र पडताळणी, गुणवत्ता यादी तयार करणे, शुल्क भरणा आणि जागा वाटप या सर्व टप्प्यांवर बारकाईने लक्ष ठेवतील. प्रक्रिया पूर्ण झाल्यानंतर ते दररोज सक्षम प्राधिकरणाकडे अनुपालन अहवाल सादर करतील. यामुळे संपूर्ण प्रक्रिया अधिक जबाबदार आणि विश्वासार्ह होईल, असे सीईटी कक्षाचे म्हणणे आहे.
संस्थास्तरीय प्रवेश प्रक्रियेत व्हिडिओ रेकॉर्डिंग आता बंधनकारक करण्यात आले आहे. कागदपत्र पडताळणी आणि जागा वाटप होणाऱ्या खोली किंवा हॉलमध्ये सीसीटीव्ही कॅमेरे कार्यरत असणे आवश्यक आहे. संपूर्ण रेकॉर्डिंग विहित कालावधीसाठी सुरक्षित ठेवावे लागेल. तपासणी, ऑडिट किंवा तक्रार निवारणासाठी प्राधिकरणाने मागणी केल्यास महाविद्यालयाने ते उपलब्ध करून द्यावे. नियमांचे उल्लंघन आढळल्यास संबंधित संस्थेवर कठोर कारवाई करण्यात येईल.
विद्यार्थी आणि पालकांना सीईटी कक्षाने स्पष्ट आवाहन केले आहे की, केंद्रीभूत फेऱ्या संपण्यापूर्वी जागा मिळवून देण्याचे आश्वासन देणाऱ्या एजंट, मध्यस्थ किंवा खाजगी समुपदेशकांच्या प्रलोभनांना बळी पडू नये. सोशल मीडिया किंवा खाजगी लिंक्सद्वारे पसरवली जाणारी दिशाभूल करणारी माहिती टाळावी. योग्य मार्गदर्शनासाठी विद्यार्थी सहाय्यता केंद्राशी संपर्क साधावा. माहिती पुस्तिकेतील निर्देशांचे काटेकोर पालन करणे सर्वांसाठी आवश्यक आहे.
