एमबीबीएस व बीडीएसची पहिली प्रवेश यादी जाहीर; १० हजार ५०९ विद्यार्थ्यांना संधी

एज्युवार्ता न्यूज नेटवर्क 

महाराष्ट्र राज्य सामाईक प्रवेश परीक्षा कक्षातर्फे (CET Cell) शैक्षणिक वर्ष २०२६-२७ च्या वैद्यकीय शिक्षणांतर्गत एमबीबीएस (MBBS) व बीडीएस (BDS) पदवी अभ्यासक्रमांची पहिली केंद्रीभूत प्रवेश यादी जाहीर करण्यात आली आहे. राज्य कोट्यांतर्गत जाहीर करण्यात आलेल्या या यादीत १० हजार ६४६ एकूण जागांपैकी १० हजार ५०९ विद्यार्थ्यांना प्रवेशाची संधी मिळाली आहे.

एमबीबीएस (MBBS) एकूण ८,१२९ जागांपैकी ८,०६५ विद्यार्थ्यांना प्रवेश वाटप झाले आहे. यात दिव्यांग व अनाथ संवर्गातील ६४ जागा रिक्त राहिल्या आहेत.बीडीएस (BDS) एकूण २ हजार ५१७ जागांपैकी २ हजार ४४४ विद्यार्थ्यांना प्रवेशाची संधी मिळाली आहे. या प्रकारात दिव्यांग व अनाथ संवर्गातील ७३ जागा रिक्त राहिल्या आहेत.

पहिल्या फेरीत महाविद्यालय मिळालेल्या विद्यार्थ्यांना ३१ ऑगस्ट २०२६ ते ४ सप्टेंबर २०२६ दरम्यान सायंकाळी ५.३० वाजेपर्यंत मिळालेल्या महाविद्यालयात प्रत्यक्ष उपस्थित राहून प्रवेश निश्चित करायचा आहे. यासाठी मूळ कागदपत्रे आणि आवश्यक शुल्काचा डिमांड ड्राफ्ट (DD) सादर करणे बंधनकारक आहे.

बँकेच्या सुट्टीच्या दिवशी धनादेशाद्वारे (Cheque) शुल्क स्वीकारले जाईल, परंतु पुढील कामकाजाच्या दिवशी तो डिमांड ड्राफ्टने बदलून देणे आवश्यक आहे. विहित मुदतीत डिमांड ड्राफ्ट सादर न केल्यास विद्यार्थ्याचा प्रवेश रद्द केला जाऊ शकतो, असाइशारा सीईटी कक्ष यांच्याकडून देण्यात आला आहे.