विद्यार्थ्यांच्या मानसिक आरोग्यासाठी ‘मानस सूत्र’; राज्यात १,२३१ समुपदेशकांची नियुक्ती
व्यसनाधीनता, नैराश्य आणि आत्महत्येसारख्या गंभीर समस्यांना तोंड देण्यासाठी उच्च व तंत्र शिक्षण विभागाने ‘मानस सूत्र’ हा महत्त्वाकांक्षी उपक्रम सुरू केला आहे. या अंतर्गत राज्यातील महाविद्यालयांमध्ये प्रथमच एकूण १ हजार २३१ समुपदेशकांची नियुक्ती करण्यात आली आहे.
Eduvarta
0
एज्युवार्ता न्यूज नेटवर्क
व्यसनाधीनता, नैराश्य आणि आत्महत्येसारख्या गंभीर समस्यांना तोंड देण्यासाठी उच्च व तंत्र शिक्षण विभागाने ‘मानस सूत्र’ हा महत्त्वाकांक्षी उपक्रम सुरू केला आहे. या अंतर्गत राज्यातील महाविद्यालयांमध्ये प्रथमच एकूण १ हजार २३१ समुपदेशकांची नियुक्ती करण्यात आली आहे. उच्च शिक्षण संचालक आणि एमएसएफडीएचे कार्यकारी संचालक डॉ. शैलेंद्र देवळाणकर यांनी याबाबतची माहिती दिली आहे. सर्वोच्च न्यायालयातील एका प्रकरणानुषंगाने मुख्य सचिवांकडे दाखल प्रतिज्ञापत्रातही ही नियुक्ती नमूद करण्यात आली आहे.
सर्व समुपदेशकांची नावे आणि मोबाइल क्रमांक प्रशासनाकडे उपलब्ध आहेत. विद्यार्थ्यांच्या मानसिक व भावनिक आरोग्यावर प्रभावीपणे काम करता यावे यासाठी त्यांना विशेष प्रशिक्षण दिले जात आहे. ‘मानस सूत्र’ उपक्रमांतर्गत तीन दिवसांचा अभ्यासक्रम तयार करण्यात आला असून पहिल्या ५० जणांच्या तुकडीचे प्रशिक्षण मागील महिन्यात पूर्ण झाले आहे. प्रशिक्षण पूर्ण करणाऱ्यांना महाराष्ट्र राज्य अध्यापक विकास संस्थेकडून प्रमाणपत्र दिले जाणार आहे.
सोशल मीडियामुळे जग जवळ आले असले तरी व्यक्तीमधील एकटेपण, मानसिक ताण आणि भावनिक अस्वस्थता वाढत आहे. ही आजच्या युगातील मोठी सामाजिक समस्या बनली आहे. महाविद्यालयीन विद्यार्थ्यांच्या मानसिक स्वास्थ्यासाठी राज्यात इतक्या मोठ्या प्रमाणात समुपदेशक नेमल्याने ‘मानस सूत्र’ उपक्रमाकडे सर्वांचे लक्ष वेधले गेले आहे.
या उपक्रमामुळे विद्यार्थ्यांना वेळेवर मार्गदर्शन आणि मानसिक आधार मिळेल, अशी अपेक्षा आहे. प्रशासनाकडून समुपदेशकांच्या कामावर लक्ष ठेवले जाणार असून, त्यांच्या माध्यमातून महाविद्यालयांमध्ये सकारात्मक वातावरण निर्माण होईल. विद्यार्थ्यांच्या एकूण विकासासाठी हा उपक्रम महत्त्वाची भूमिका बजावेल, असे सांगण्यात येत आहे.
