पदवीधरांना सुवर्णसंधी ! IBPS मार्फत तब्बल 13,706 पदांसाठी मेगाभरती
IBPS ने पदवीधर आणि व्यावसायिकांसाठी १३,७०६ बँक रिक्त जागांची भरती जाहीर केली आहे. पात्रता, वयोमर्यादा व शुल्क तपासा आणि २१ सप्टेंबरपर्यंत अर्ज करा.
Eduvarta
एज्युवार्ता न्यूज नेटवर्क
बँकिंग क्षेत्रात करिअर करू इच्छिणाऱ्या पदवीधर तरुण-तरुणींसाठी आनंदाची बातमी आहे. इन्स्टिट्यूट ऑफ बँकिंग पर्सोनेल सिलेक्शनने (IBPS) देशभरातील विविध बँकांमध्ये एकूण 13,706 जागांसाठी मेगाभरतीची घोषणा केली आहे. या भरतीत ऑफिस असिस्टंट, असिस्टंट मॅनेजर ते वरिष्ठ अधिकारी पदांचा समावेश असून, इच्छुक उमेदवारांना 21 सप्टेंबर 2026 पर्यंत ऑनलाइन अर्ज करता येणार आहे.
या मेगाभरतीत ऑफिस असिस्टंट (मल्टीपर्पज) पदासाठी सर्वाधिक 8,183 जागा आहेत. त्यापाठोपाठ ऑफिसर स्केल-वन (असिस्टंट मॅनेजर) साठी 4,256, ऑफिसर स्केल-टू जनरल बँकिंग ऑफिसरसाठी 666, आयटीसाठी 182, सीएसाठी 81, लॉसाठी 46, ट्रेझरी मॅनेजरसाठी 18, मार्केटिंग ऑफिसरसाठी 16, अॅग्रीकल्चर मॅनेजरसाठी 38 आणि ऑफिसर स्केल-थ्रीसाठी 220 जागा उपलब्ध आहेत. विविध पदांसाठी वेगवेगळ्या पात्रता शर्ती लागू आहेत.
ऑफिस असिस्टंट आणि ऑफिसर स्केल-वन पदांसाठी कोणत्याही शाखेतील पदवी पुरेशी आहे. जनरल बँकिंग ऑफिसरसाठी पदवीसोबत किमान 50 टक्के गुण आणि दोन वर्षांचा अनुभव आवश्यक आहे. आयटी पदासाठी इलेक्ट्रॉनिक्स, कम्युनिकेशन, कॉम्प्युटर सायन्स किंवा आयटीमधील पदवी व एक वर्षाचा अनुभव, सीएसाठी सीए प्रमाणपत्र व एक वर्षाचा अनुभव, तर लॉसाठी 50 टक्के गुणांसह एलएलबी आणि दोन वर्षांचा अनुभव अपेक्षित आहे. ट्रेझरी मॅनेजरसाठी सीए किंवा एमबीए (फायनान्स), मार्केटिंगसाठी एमबीए (मार्केटिंग) आणि अॅग्रीकल्चर मॅनेजरसाठी कृषी संबंधित पदवी आवश्यक आहे. स्केल-थ्रीसाठी पदवीत 50 टक्के गुण आणि पाच वर्षांचा अनुभव हवा.
वयाची गणना 1 सप्टेंबर 2026 रोजी केली जाईल. ऑफिस असिस्टंटसाठी वयोमर्यादा 18 ते 28 वर्षे, स्केल-वनसाठी 18 ते 30 वर्षे, स्केल-टूच्या पदांसाठी 21 ते 32 वर्षे आणि स्केल-थ्रीसाठी 21 ते 40 वर्षे आहे. अनुसूचित जाती-जमाती उमेदवारांना पाच वर्षे तर इतर मागासवर्गीयांना तीन वर्षांची सूट मिळेल.
अर्ज शुल्क ऑफिस असिस्टंटसाठी सामान्य व ओबीसी उमेदवारांना 850 रुपये तर एससी-एसटी, दिव्यांग व माजी सैनिकांना 175 रुपये आहे. अधिकारी पदांसाठीही सामान्य-ओबीसींसाठी 850 आणि आरक्षित वर्गांसाठी 175 रुपये शुल्क ठेवण्यात आले आहे. अर्ज प्रक्रिया पूर्णपणे ऑनलाइन राहील.
