एलएलबी पाच वर्षीय प्रवेश: तिसऱ्या फेरीसाठी ३ सप्टेंबरपासून अर्ज नोंदणी व पर्याय निवड प्रक्रिया सुरू

एज्युवार्ता न्यूज नेटवर्क 

राज्य सामाईक प्रवेश परीक्षा कक्षातर्फे (CET Cell) पाच वर्षीय विधी अभ्यासक्रमाच्या (LLB-5 Yrs) केंद्रीभूत प्रवेश प्रक्रियेतील (CAP) तिसऱ्या फेरीचे (Round-III) वेळापत्रक जाहीर करण्यात आले आहे. या फेरीसाठी नवीन उमेदवारांची नोंदणी आणि महाविद्यालय पसंतीक्रम अर्ज (Option Form) भरण्याची प्रक्रिया ३ सप्टेंबर ते ५ सप्टेंबर २०२६ या कालावधीत पार पडणार आहे.

तिसऱ्या फेरीत सहभागी होणाऱ्या सर्व उमेदवारांसाठी (नवीन नोंदणीकृत आणि अद्याप प्रवेश न मिळालेले उमेदवार) नवीन महाविद्यालय पसंतीक्रम अर्ज भरणे अनिवार्य आहे. ज्या उमेदवारांनी पहिल्या किंवा दुसऱ्या फेरीत एखाद्या महाविद्यालयात प्रवेश घेतला आहे, परंतु त्यांना तिसऱ्या फेरीत सुधारणेसाठी (Betterment) सहभागी व्हायचे आहे, अशा उमेदवारांना ३ ते ५ सप्टेंबर दरम्यान आपला मागील प्रवेश रद्द करावा लागेल. त्यानंतरच त्यांना नवीन पसंतीक्रम भरता येईल. प्रवेश रद्द करण्याची लिंक उमेदवारांच्या लॉगिन आयडीमध्ये उपलब्ध करून देण्यात आली आहे.

५ वर्षीय विधी अभ्यासक्रमाच्या आतापर्यंत दोन फेऱ्या पूर्ण झाल्या असून, त्याद्वारे राज्यातील विविध विधी महाविद्यालयांमध्ये ४ हजार १८२ विद्यार्थ्यांनी आपले प्रवेश निश्चित केले आहेत. अधिक माहिती व सविस्तर सूचनेसाठी विद्यार्थ्यांनी अधिकृत संकेतस्थळाला भेट द्यावी, असे आवाहन सीईटी कक्षातर्फे करण्यात आले आहे.