पर्यावरणपूरक राखी निर्मितीतून विद्यार्थ्यांनी दिला निसर्गसंवर्धनाचा संदेश
रक्षाबंधनाच्या पार्श्वभूमीवर महाराष्ट्र एज्युकेशन सोसायटीच्या बाल शिक्षण मंदीर इंग्लिश मिडियम शाळेतील प्राथमिक विभागातील विद्यार्थ्यांसाठी पर्यावरणपूरक राखी निर्मिती उपक्रमाचे आयोजन करण्यात आले.
Eduvarta
एज्युवार्ता न्यूज नेटवर्क
बहीण-भावाच्या प्रेमाचे आणि स्नेहाचे प्रतीक असलेल्या रक्षाबंधनाच्या पार्श्वभूमीवर महाराष्ट्र एज्युकेशन सोसायटीच्या बाल शिक्षण मंदीर इंग्लिश मिडियम शाळेतील प्राथमिक विभागातील विद्यार्थ्यांसाठी पर्यावरणपूरक राखी निर्मिती उपक्रमाचे आयोजन करण्यात आले. विद्यार्थ्यांनी या उपक्रमात उत्स्फूर्त सहभाग घेत नैसर्गिक व पुनर्वापर करता येणाऱ्या साहित्याचा वापर करून आकर्षक राख्या तयार केल्या.
या सर्जनशील उपक्रमातून विद्यार्थ्यांच्या कल्पनाशक्तीला आणि कलाकौशल्याला वाव मिळाला. विविध रंग, आकार आणि नैसर्गिक साहित्याचा कल्पक वापर करून विद्यार्थ्यांनी सुंदर राख्या साकारल्या. त्याचबरोबर पर्यावरणाचे रक्षण, पुनर्वापर आणि शाश्वत जीवनशैली याबाबत विद्यार्थ्यांमध्ये जागरूकता निर्माण झाली.
रक्षाबंधनाच्या निमित्ताने आयोजित या उपक्रमातून प्रेम, बंधुभाव आणि एकोप्यासोबतच पर्यावरण संवर्धनाचा संदेश देण्यात आला. कृतीतून शिक्षण देणाऱ्या या उपक्रमामुळे विद्यार्थ्यांमध्ये सर्जनशीलता, हस्तकौशल्य आणि पर्यावरणाप्रती जबाबदारीची भावना विकसित होण्यास मदत झाली.
