मुक्त विद्यापीठाच्या सत्र परीक्षेला उद्यापासून सुरुवात 

एज्युवार्ता न्यूज नेटवर्क 

विधानसभा निवडणूक आणि इतर विद्यापीठांच्या नियमित परीक्षा लक्षात घेऊन यशवंतराव चव्हाण महाराष्ट्र मुक्त विद्यापीठाच्या (Yashwantrao Chavan Maharashtra Open University) हिवाळी सत्र परीक्षा (Winter semester exam) उद्या मंगळवार दि. ७ जानेवारीपासून सुरू होणार आहेत. या परीक्षांचा कार्यक्रम ७ जानेवारी ते २३ जानेवारी अशा जवळपास पंधरा दिवस चालणार आहेत. शैक्षणिक वर्ष २०२४-२५ (Academic year 2024-25) च्या हिवाळी सत्रातील प्रवेशित नियमित विद्यार्थांची सत्र परीक्षा व मे २०२४ परीक्षेत अनुत्तीर्ण झालेल्या पुनर्परीक्षार्थी विद्यार्थ्यांची ही परीक्षा घेतली जाणार आहे. 

महाराष्ट्र भरातून यशवंतराव चव्हाण महाराष्ट्र मुक्त विद्यापीठाच्या अभ्यास केंद्रावर प्रवेश घेतलेले जवळपास एक लाख ९ हजार २३७ विद्यार्थी ही परीक्षा देतील. राज्यातील विविध २३५ परीक्षा केंद्रांवर ही परीक्षा घेतली जाणार आहे. परीक्षेसंदर्भातील आवश्यक ती सर्व शैक्षणिक व प्रशासकीय तयारी विद्यापीठातर्फे पूर्ण करण्यात आली आहे. विद्यार्थ्यांसाठी मदत यंत्रणाही कार्यरत करण्यात आलेली आहे. काही समस्या उद्भवल्यास विद्यार्थ्यी विद्यापीठ मदत केंद्राशी संपर्क साधू शकतात. 

परीक्षा आयोजनाच्या सर्व मार्गदर्शक सूचना विभागीय केंद्रांमार्फत परीक्षा केंद्रांना देण्यात आलेल्या आहेत. पोर्टलवरच विद्यार्थ्यांना प्रवेशपत्र उपलब्ध करून देण्यात आले आहे. पूर्वनियोजित वेळापत्रकानुसार विद्यापीठाच्या या परीक्षा सुरू होत आहेत. परीक्षा सुरळीत पार पाडण्यासाठी विद्यापीठाकडून आवश्यक ती काळजी घेतली जाणार असल्याची माहिती परीक्षा नियंत्रक विभागाने दिली आहे.