हा घ्या पुरावा..! प्राध्यापक पदासाठी खुलेआम 80 लाख मागितले; कॉल रेकॉर्ड उपलब्ध;कारवाईची मागणी
या प्रकरणात संबंधित संवादासाठी वापरण्यात आलेला मोबाईल क्रमांक महाविद्यालयाच्या अधिकृत संकेतस्थळावर संपर्क क्रमांक म्हणून प्रसिद्ध असल्याचे तक्रारीत नमूद करण्यात आले आहे. त्यामुळे या क्रमांकाचा प्रत्यक्ष वापर कोण करत होते, त्याचा महाविद्यालयाशी अधिकृत संबंध काय होता, याची चौकशी करण्याची मागणी करण्यात आली आहे.
Eduvarta
एज्युवार्ता न्यूज नेटवर्क
चंद्रपूर येथील एका विधी महाविद्यालयातील क्लार्कने Assistant Professor पदाच्या नियुक्ती प्रक्रियेत 80 लाख रुपयांची कथित आर्थिक मागणी झाल्याची गंभीर तक्रार अक्षय चंद्रकांत दहिफळे यांनी केली आहे. या प्रकरणी त्यांनी लाचलुचपत प्रतिबंधक विभाग, आर्थिक गुन्हे शाखा, गोंडवाना विद्यापीठ तसेच उच्च व तंत्र शिक्षण विभागाकडे ई-मेलद्वारे तक्रार सादर केली आहे.त्यामुळे राज्यात प्राध्यापक भरतीसाठी लाखों रूपयांचा भाव फुटला असल्याचे अधोरेखित होत आहे.या प्रकरणाची चौकशी करावी,अशी मागणी करण्यात आली आहे.
अक्षय दहिफळे यांनी चंद्रपूर येथील एका विधी महाविद्यालयात 21 ऑगस्ट रोजी Assistant Professor पदासाठी अर्ज केला होता. त्यानंतर प्रदीप महाकालकर नावाच्या व्यक्तीने स्वतःची ओळख महाविद्यालयातील Clerk म्हणून करून देत दहिफळे यांच्याबरोबर मोबाईलवरून संवाद साधला.या सांभाषणाचे चार कॉल रेकॉर्ड उपलब्ध असून त्यात प्राध्यापक पदाच्या नियुक्तीसाठी 80 लाख रुपयांची मागणी केल्याचे दिसून येत आहे.
तक्रारदार दहिफळे यांच्या म्हणण्यानुसार संबंधित व्यक्तीकडून WhatsApp वर “आता 50 द्यावं लागेल, बाकी नंतर” असा संदेश प्राप्त झाला. या प्रकरणातील WhatsApp संभाषणाचे स्क्रीनशॉट, दूरध्वनी संभाषणांच्या रेकॉर्डिंग्ज, कॉल हिस्ट्री व अन्य इलेक्ट्रॉनिक पुरावे सुरक्षित असल्याचा दावा दहिफळे यांनी केला आहे. मात्र, आपण कोणतीही रक्कम दिलेली नसून आर्थिक व्यवहारास संमती दिलेली नाही, असेही त्यांनी स्पष्ट केले.
या प्रकरणात संबंधित संवादासाठी वापरण्यात आलेला मोबाईल क्रमांक महाविद्यालयाच्या अधिकृत संकेतस्थळावर संपर्क क्रमांक म्हणून प्रसिद्ध असल्याचे तक्रारीत नमूद करण्यात आले आहे. त्यामुळे या क्रमांकाचा प्रत्यक्ष वापर कोण करत होते, त्याचा महाविद्यालयाशी अधिकृत संबंध काय होता, याची चौकशी करण्याची मागणी करण्यात आली आहे.
दरम्यान, NSUI चे राज्य उपाध्यक्ष अक्षय कांबळे यांनीही या कथित प्रकाराविरोधात आवाज उठवत शिक्षक भरती प्रक्रिया पारदर्शक व गुणवत्ताधारित असावी, अशी मागणी केली आहे.
तक्रारदाराने संपूर्ण Assistant Professor भरती प्रक्रिया, Selection Committee, merit records तसेच संबंधित electronic evidence ची स्वतंत्र व निष्पक्ष चौकशी करण्याची मागणी केली आहे. या प्रकरणातील आरोपांची अंतिम सत्यता सक्षम तपास यंत्रणेच्या चौकशीनंतरच स्पष्ट होणार आहे.
