ओबीसी विद्यार्थ्यांसाठी मोठा निर्णय : 'महाज्योती'मार्फत 5 ठिकाणी 'उत्कृष्ठता केंद्रे' स्थापन होणार

एज्युवार्ता न्यूज नेटवर्क 

राज्याचे मुख्यमंत्री देवेंद्र फडणवीस (Chief Minister Devendra Fadnavis) यांनी ओबीसी विद्यार्थ्यांसाठी मोठा निर्णय घेतला आहे. महात्मा ज्योतिबा फुले संशोधन व प्रशिक्षण (Mahatma Jyotiba Phule Research and Training Institute) (महाज्योती) संस्थेमार्फत विद्यार्थ्यांना स्पर्धा परीक्षांचे कोचिंग आणि फेलोशिपसारख्या योजना राबविण्यात येतात. त्यानुसार आता महाज्योती संस्थेमार्फत पुणे, अमरावती, नागपूर, छत्रपती संभाजीनगर आणि नाशिक या पाच प्रमुख जिल्ह्यांमध्ये 'उत्कृष्टता केंद्र' स्थापन (Establishment of Center of Excellence) करण्यात येणार आहेत. या केंद्रामार्फत विद्यार्थ्यांना विविध क्षेत्रांमध्ये प्रशिक्षित करण्याचे उद्दिष्ट असल्याचे मुख्यमंत्री देवेंद्र फडणवीस यांनी सांगितले. या निर्णयामुळे ओबीसी विद्यार्थ्यांना मोठा शैक्षणिक फायदा होणार आहे. 

सह्याद्री अतिथीगृह येथे इतर मागास बहुजन कल्याण विभागाचा कामांचा मुख्यमंत्री फडणवीस यांनी आढावा घेतला. या बैठकीस इतर मागास बहुजन कल्याण मंत्री अतुल सावे दूरदृश्य प्रणालीद्वारे उपस्थित होते. या केंद्रामार्फत विद्यार्थ्यांना विविध क्षेत्रांमध्ये प्रशिक्षित करण्यात येईल, असे ते यावेळी म्हणाले. 

फडणवीस म्हणाले की, विभागामार्फत चालविण्यात येणाऱ्या ‘विमुक्त जाती व भटक्या जमाती’ प्रवर्गाच्या खासगी अनुदानित निवासी आश्रम शाळांमधील विद्यार्थ्यांना तांत्रिकदृष्ट्या अत्याधुनिक गुणवत्तेचे शिक्षण डिजिटल पद्धतीने उपलब्ध करून देण्यासाठी डिजिटल क्लासरूम प्रकल्प राबविण्यात येणार आहे.

इतर मागास प्रर्वगातील मुला-मुलींसाठी  जिल्ह्याच्या ठिकाणी वसतिगृहे सुरू करण्याबाबत जागा उपलब्धेसाठी मुख्य सचिव यांनी  संबंधित जिल्ह्यातील  जिल्हाधिकारी यांच्यासमवेत बैठक घेण्यात यावी, अशा सूचना मुख्यमंत्री देवेंद्र फडणवीस यांनी अधिकार्‍यांना दिल्या.