एमपीएससी गैरकारभाराविरोधात विद्यार्थ्यांचा एल्गार; परीक्षा प्रक्रियेतील पारदर्शकतेची मागणी
परीक्षेतील पारदर्शकता, कथित पेपरफुटी आणि अनियमितता या मुद्द्यांवरून अमरावतीत MPSC विद्यार्थ्यांनी निदर्शने केली असून, त्यांनी स्वतंत्र चौकशी व जबाबदारी निश्चित करण्याची मागणी केली आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोग म्हणजे लाखो विद्यार्थ्यांच्या करिअरची स्वप्नपूर्ती करणारी महत्त्वाची संस्था आहे. स्पर्धा परीक्षा प्रणालीतील विश्वासार्हता टिकवणे हे शैक्षणिक व्यवस्थेचे मूलभूत उत्तरदायित्व आहे. मात्र पेपरफुटीचे वारंवार होणारे आरोप, परीक्षेतील विविध गैरप्रकार आणि प्रशासकीय कारभारावर निर्माण झालेले प्रश्न विद्यार्थ्यांच्या वर्षानुवर्षांच्या मेहनतीला आणि भवितव्याला धोका निर्माण करत आहेत. या पार्श्वभूमीवर आज अमरावती येथे विद्यार्थ्यांनी रस्त्यावर उतरून आपला आवाज उठवला आणि परीक्षा प्रक्रियेतील पारदर्शकतेची मागणी केली.
स्पर्धा परीक्षांची तयारी करणारे विद्यार्थी दीर्घकाळ अभ्यास करून कठोर परिश्रम घेतात. त्यांच्या शैक्षणिक प्रयत्नांना यश मिळण्यासाठी परीक्षा प्रक्रिया पूर्णतः निष्पक्ष, सुरक्षित आणि पारदर्शक असणे आवश्यक आहे. पेपरफुटी किंवा अन्य गैरप्रकारांमुळे मेहनती विद्यार्थ्यांचे भविष्य अडचणीत येते आणि संपूर्ण स्पर्धा परीक्षा व्यवस्थेवरील विश्वास कमी होतो. अशा परिस्थितीत विद्यार्थ्यांच्या हक्कांचे संरक्षण करणे ही सरकार आणि प्रशासनाची जबाबदारी आहे.
अमरावतीतील आंदोलनात विद्यार्थ्यांनी सरकार आणि एमपीएससी प्रशासनाला स्पष्ट मागण्या मांडल्या. पेपरफुटी व परीक्षेतील सर्व गैरप्रकारांची स्वतंत्र, निष्पक्ष आणि पारदर्शक चौकशी व्हावी, अशी मुख्य मागणी आहे. दोषी व्यक्ती कोणत्याही पदावर किंवा प्रभावशाली असली तरी त्याच्यावर कठोर कारवाई होणे आवश्यक आहे. विद्यार्थ्यांच्या भवितव्याशी तडजोड करणाऱ्या अधिकाऱ्यांची जबाबदारी निश्चित करण्याचीही मागणी करण्यात आली.
एमपीएससीच्या एकूण कारभाराची सखोल चौकशी करून परीक्षा प्रक्रियेत पूर्ण पारदर्शकता आणण्याची गरज विद्यार्थ्यांनी अधोरेखित केली. सर्वात महत्त्वाचे म्हणजे या प्रकरणाची नैतिक जबाबदारी स्वीकारून एमपीएससी अध्यक्षांनी राजीनामा द्यावा, अशी ठोस मागणीही करण्यात आली. विद्यार्थी भीक मागत नाहीत तर त्यांच्या मेहनतीचा आणि शैक्षणिक हक्काचा आदर मागत आहेत, असे त्यांचे स्पष्ट मत आहे.
आज अमरावतीत पडलेली आंदोलनाची ठिणगी उद्या संपूर्ण महाराष्ट्रात व्यापक विद्यार्थी चळवळीचा रूप धारण करू शकते. सरकारने विद्यार्थ्यांच्या आवाजाकडे गांभीर्याने लक्ष देणे आवश्यक आहे. अन्यथा महाराष्ट्रातील विद्यार्थी रस्त्यावर उतरून आपल्या भवितव्याच्या रक्षणासाठी आवाज उठवतील. स्पर्धा परीक्षा व्यवस्थेची विश्वसनीयता पुनर्स्थापित करणे हे शैक्षणिक न्यायासाठी अत्यावश्यक असल्याचे मत विद्यार्थ्यांनी व्यक्त केले.
