संतापजनक घटना! स्कूल बसमध्ये तीन वर्षांच्या चिमुकलीवर अत्याचार; ३० वर्षीय चालकाला अटक
नवी मुंबईतील एका तीन वर्षांच्या मुलीशी संबंधित शालेय बसच्या प्रकरणामुळे एका व्यक्तीला अटक करण्यात आली असून 'पोक्सो' कायद्यांतर्गत तपास सुरू झाला आहे; या घटनेने मुलांच्या सुरक्षेबाबत चिंता निर्माण केली आहे.
Eduvarta
एज्युवार्ता न्यूज नेटवर्क
नवी मुंबईतील कामोठे परिसरात तीन वर्षांच्या चिमुकलीवरील लैंगिक अत्याचाराच्या घटनेने खळबळ उडाली आहे. शाळेतून विद्यार्थ्यांना घरी सोडत असताना एका खासगी स्कूल बस चालकाने बसमध्ये एकटी राहिलेल्या चिमुकलीचा गैरफायदा घेतल्याचा आरोप आहे. या प्रकरणी पोलिसांनी ३० वर्षीय चालकाला अटक केली असून पनवेल न्यायालयाने त्याला पोलीस कोठडी सुनावली आहे. घटनेमुळे पालकांमध्ये संतापाचे वातावरण निर्माण झाले आहे.
मिळालेल्या माहितीनुसार, संबंधित चिमुकली दररोज इतर विद्यार्थ्यांसोबत खासगी स्कूल बसने शाळेत ये-जा करत होती. बुधवारी दुपारी साडेबारा वाजण्याच्या सुमारास चालक विद्यार्थ्यांना त्यांच्या घराजवळील थांब्यावर सोडत होता. एकापाठोपाठ सर्व विद्यार्थी बसमधून उतरले. त्यानंतर तीन वर्षांची चिमुकली बसमध्ये एकटीच राहिली. याच परिस्थितीचा गैरफायदा घेत चालकाने तिच्यावर लैंगिक अत्याचार केल्याचा आरोप आहे.
घरी परतल्यानंतर चिमुकलीला त्रास जाणवू लागला. तिने रडत आपल्या आजीला बसमधील चालकाने आपल्यासोबत गैरप्रकार केल्याचे सांगितले.
त्यानंतर कुटुंबीयांनी तातडीने शाळा प्रशासनाशी संपर्क साधत पोलिसांकडे तक्रार केली. चिमुकलीची वैद्यकीय तपासणी करण्यात आल्यानंतर पोलिसांनी प्रकरणाची गंभीर दखल घेत गुन्हा दाखल केला. आरोपीविरोधात भारतीय न्याय संहितेतील बालकावरील बलात्कारासंबंधी कठोर तरतुदी तसेच पॉक्सो कायद्यानुसार कारवाई करण्यात आली आहे.
गुरुवारी आरोपीला पनवेल न्यायालयात हजर करण्यात आले. न्यायालयाने त्याला शनिवारपर्यंत पोलीस कोठडी सुनावली आहे.
दरम्यान, या प्रकरणाचा अधिक तपास सुरू असून स्कूल बसच्या व्यवस्थापनाशी संबंधित व्यक्ती आणि शाळेतील कर्मचाऱ्यांचीही चौकशी केली जात आहे. या घटनेनंतर विद्यार्थ्यांच्या सुरक्षिततेसाठी स्कूल बसमध्ये चालकासोबत आवश्यक देखरेख व्यवस्था, सुरक्षित वाहतूक नियम आणि बालसुरक्षेच्या उपाययोजनांची प्रभावी अंमलबजावणी करण्याची मागणी पालकांकडून होत आहे.
