एलएलबी, बीपीएड, एमपीएड अभ्यासक्रमांच्या कॅप नोंदणीला सुरूवात

एज्युवार्ता न्यूज नेटवर्क 

 महाराष्ट्र राज्य सामाईक प्रवेश परीक्षा (सीईटी) कक्षातर्फे शैक्षणिक वर्ष २०२६-२७ साठी उच्च शिक्षण विभागांतर्गत येणाऱ्या ३ वर्षीय विधी (एलएलबी), बॅचलर ऑफ फिजिकल एज्युकेशन (बीपीएड) आणि मास्टर ऑफ फिजिकल एज्युकेशन (एमपीएड) या अभ्यासक्रमांच्या कॅप नोंदणीस सुरूवात झाली   आहे. या तिन्ही अभ्यासक्रमांसाठी ऑनलाइन नोंदणीची अंतिम मुदत ३० जून २०२६ निश्चित करण्यात आली आहे.

मार्च-एप्रिल २०२६ दरम्यान घेण्यात आलेल्या संबंधित सीईटी परीक्षांना बसलेल्या विद्यार्थ्यांनी कॅप प्रवेश प्रक्रियेसाठी ऑनलाइन नोंदणी करावी, असे आवाहन सीईटी कक्षाने केले आहे.

ऑनलाइन अर्ज करताना विद्यार्थ्यांनी पासपोर्ट आकाराचे रंगीत फोटो तसेच स्वाक्षरीची (सिग्नेचर इमेज) निश्चित आकारात जेपीजी किंवा जेपीईजी स्वरूपात अपलोड करणे आवश्यक आहे. याशिवाय प्रवेशासाठी आवश्यक असलेली शैक्षणिक व इतर कागदपत्रे स्कॅन करून निश्चित आकारातील पीडीएफ स्वरूपात अपलोड करावीत. आवश्यक कागदपत्रांची सविस्तर माहिती सीईटी कक्षाच्या अधिकृत संकेतस्थळावर उपलब्ध करून देण्यात आली आहे.

सीईटी कक्षाने दिलेल्या माहितीनुसार, ३ वर्षीय एलएलबी सीईटी परीक्षा १ व २ एप्रिल २०२६ रोजी घेण्यात आली होती. या परीक्षेला ६९ हजार ४७३ विद्यार्थी उपस्थित होते. बीपीएड सीईटी ४ एप्रिल २०२६ रोजी पार पडली असून त्यासाठी ५,०४० विद्यार्थ्यांनी परीक्षा दिली. तर एमपीएड सीईटी २४ मार्च २०२६ रोजी घेण्यात आली असून २,१४३ विद्यार्थी या परीक्षेला बसले होते.

या तिन्ही अभ्यासक्रमांच्या सीईटी परीक्षांचे निकाल २७ मे २०२६ रोजी जाहीर करण्यात आले होते. प्रवेश प्रक्रियेसंदर्भातील अद्ययावत माहिती, वेळापत्रक व मार्गदर्शक सूचना जाणून घेण्यासाठी विद्यार्थ्यांनी सीईटी कक्षाच्या अधिकृत संकेतस्थळाला नियमित भेट द्यावी, असे आवाहन करण्यात आले आहे.