CET Cell :  एलएलबी ५ वर्षे सीईटीचा निकाल जाहीर; उमेदवारांच्या लॉगिनमध्ये गुणपत्रिका उपलब्ध

एज्युवार्ता न्यूज नेटवर्क 

महाराष्ट्र राज्य सामाईक प्रवेश परीक्षा कक्षाने (State CET Cell) महत्त्वाची घोषणा करत LLB ५ वर्षीय (5-year LLB) एकात्मिक अभ्यासक्रमासाठी आयोजित MH CET Law २०२६ चा निकाल जाहीर (Results Declared) केला आहे. उमेदवार आता अधिकृत वेबसाइट cetcell.mahacet.org किंवा portal-2026.maharashtracet.org वर लॉगिन करून आपली गुणपत्रिका (Scorecard) डाउनलोड करू शकतात. 

पाच वर्षीय विधी (LLB 5 Years) या सीईटीमध्ये एकूण २ विद्यार्थ्यांनी १०० पर्सेंटाईल गुण मिळवले आहेत. राज्यातील पुणे येथील स्पंदना वत्स या विद्यार्थिनीने तर हरियाणा राज्यातील रेवाडी येथील सिद्धार्थ यादव या राज्याबाहेरील विद्यार्थ्यांनी सीईटीमध्ये १०० पर्सेंटाईल गुण मिळविले आहेत.

या परीक्षेला यंदा अभूतपूर्व प्रतिसाद मिळाला होता. यासाठी एकूण ३७ हजार १४० उमेदवारांनी नोंदणी केली होती, त्यापैकी २९ हजार २८८ उमेदवारांनी परीक्षा दिली. ही संख्या गेल्या पाच वर्षांतील सर्वाधिक आहे. ज्यामुळे ही परीक्षा स्पर्धात्मक झाल्याचे दिसून येत आहे. यामुळे महाविद्यालयांची गुणवत्ता यादी देखील वाढणार असल्याचे दिसून येत आहे. ही परीक्षा ८ मे २०२६ रोजी विविध केंद्रांवर दोन शिफ्टमध्ये घेण्यात आली. 

असा तपासा निकाल -

निकाल पाहाण्यासाठी अधिकृत संकेतस्थळ  cetcell.mahacet.org वर जा. तिथे गेल्यावर उमेदवारांना आपला अर्ज क्रमांक, पासवर्ड किंवा रजिस्टर्ड मोबाइल/ईमेल वापरून लॉगिन करावे लागेल. गुणपत्रिकेत एकूण गुण १५० पैकी, पर्सेंटाइल स्कोअर, राज्य क्रमांक, श्रेणीनुसार मेरिट आणि इतर महत्त्वाची माहिती उपलब्ध असेल. निकाल प्रक्रियेत नॉर्मलायझेशन पद्धत वापरण्यात आली आहे, ज्यामुळे विविध शिफ्टमधील उमेदवारांना न्याय देण्याचा प्रयत्न करण्यात आला आहे. 

निकालानंतर केंद्रीकृत प्रवेश प्रक्रिया (CAP) लवकरच सुरू होणार आहे. यात नोंदणी, दस्तऐवज पडताळणी, महाविद्यालय पर्याय भरणे आणि सीट अलॉटमेंटचा समावेश आहे. महाराष्ट्रातील १५० पेक्षा अधिक विधी महाविद्यालयांमध्ये सुमारे १० हजार ८६० जागा या परीक्षेद्वारे भरल्या जातील. उमेदवारांनी अधिकृत वेबसाइटवर नियमित अपडेट्स तपासात राहावे, असे सीईटी सेल कक्षाकडून करण्यात आले आहे.