‘वन डे टीचर’ उपक्रमातून पालकांनी अनुभवली शिक्षकाची भूमिका

एज्युवार्ता न्यूज नेटवर्क 

 एम.ई.एस. इंग्लिश मीडियम स्कूल, शिरवळच्या प्राथमिक विभागात ५ सप्टेंबर २०२६ रोजी शिक्षक दिन उत्साहात साजरा करण्यात आला. शिक्षक दिनानिमित्त पालकांसाठी विशेष ‘वन डे टीचर’ या अभिनव उपक्रमाचे आयोजन करण्यात आले.

या उपक्रमांतर्गत पालकांनी एक दिवस शिक्षकाची भूमिका स्वीकारून विद्यार्थ्यांना विविध विषयांचे धडे व शैक्षणिक उपक्रम घेतले. पालकांनी प्रश्नोत्तर, चर्चा, खेळ तसेच विविध वर्गातील कृतींच्या माध्यमातून विद्यार्थ्यांना आनंददायी आणि मनोरंजक पद्धतीने शिकविले.

आपले पालकच शिक्षकाच्या भूमिकेत पाहून विद्यार्थ्यांमध्ये मोठा उत्साह निर्माण झाला. विद्यार्थ्यांनी सर्व उपक्रमांमध्ये उत्स्फूर्त सहभाग घेतला. या उपक्रमामुळे पालकांना शिक्षकाची भूमिका प्रत्यक्ष अनुभवण्याची तसेच विद्यार्थ्यांच्या अध्यापन-अधिगम प्रक्रियेतील बारकावे समजून घेण्याची संधी मिळाली.

उपक्रमानंतर सहभागी पालकांनी आपला अनुभव व अभिप्राय व्यक्त केला. विद्यार्थ्यांसोबत संवाद साधताना आणि त्यांना शिकविताना आपल्याला खूप आनंद मिळाल्याचे त्यांनी सांगितले. तसेच शाळेने राबविलेल्या या उपक्रमाचे कौतुक करून अशा उपक्रमांमुळे पालक, शिक्षक आणि विद्यार्थी यांच्यातील नाते अधिक दृढ होते, असे मत व्यक्त केले.

‘वन डे टीचर’ हा उपक्रम आनंददायी, सर्जनशील आणि शैक्षणिकदृष्ट्या अर्थपूर्ण ठरला. या उपक्रमामुळे शिक्षक दिनाचा उत्सव अधिक संस्मरणीय झाला.