पॉलिटेक्निक नवीन प्रवेश हिवाळी-२०२६ परीक्षा अर्ज प्रक्रिया सुरू; 'या' तारखेपर्यंत मुदत
महाराष्ट्र राज्य तंत्र शिक्षण मंडळाने पॉलिटेक्निक अभ्यासक्रमाच्या प्रथम वर्षासह थेट द्वितीय वर्षात नव्याने प्रवेश घेतलेल्या विद्यार्थ्यांसाठी नोंदणी आणि हिवाळी-२०२६ परीक्षेच्या अर्जाचे वेळापत्रक जाहीर केले आहे. एआयसीटीई मान्यताप्राप्त अभ्यासक्रमांच्या विद्यार्थ्यांची नोंदणी प्रक्रिया संस्थास्तरावर करण्यात येणार असून नियमित शुल्कासह परीक्षा अर्ज भरण्यासाठी २२ आणि २३ ऑगस्टची मुदत देण्यात आली आहे.
Eduvarta
एज्युवार्ता न्यूज नेटवर्क
महाराष्ट्र राज्य तंत्र शिक्षण मंडळाने (Maharashtra State Board of Technical Education) पॉलिटेक्निक अभ्यासक्रमाच्या (Polytechnic Course) प्रथम वर्षासह थेट द्वितीय वर्षात नव्याने प्रवेश घेतलेल्या विद्यार्थ्यांसाठी नोंदणी आणि हिवाळी-२०२६ (Winter 2026 Examination) परीक्षेच्या अर्जाचे वेळापत्रक जाहीर केले आहे. एआयसीटीई मान्यताप्राप्त (AICTE-approved) अभ्यासक्रमांच्या विद्यार्थ्यांची नोंदणी प्रक्रिया संस्थास्तरावर करण्यात येणार असून नियमित शुल्कासह परीक्षा अर्ज भरण्यासाठी २२ आणि २३ ऑगस्टची (22-23 August Regular Fee) मुदत देण्यात आली आहे. यानंतर ४ सप्टेंबरला २०० रुपये दंडासह तर ५ ते ७ सप्टेंबरदरम्यान (5-7 September overdue penalty)अतिविलंब दंडासह अर्ज भरता येणार आहेत.
राज्यातील पदविका प्रवेश प्रक्रियेने यंदा नवा टप्पा गाठला आहे. केंद्रीय प्रवेश प्रक्रियेत गेल्या वर्षीच्या एक लाख सात हजार प्रवेशांचा विक्रम सहज मोडला गेला आहे. यामुळे अधिक विद्यार्थ्यांना पॉलिटेक्निक शिक्षणाची संधी मिळाली असून संस्थांनी प्रवेश क्षमतेनुसार नोंदणी करण्याची दक्षता घ्यावी, असे मंडळाने स्पष्ट केले आहे. नोंदणीकृत विद्यार्थ्यांची संख्या संबंधित संस्था आणि अभ्यासक्रमाच्या मंजूर प्रवेश क्षमतेपेक्षा अधिक होणार नाही, याची काळजी घेण्याचे निर्देश देण्यात आले आहेत.
विद्यार्थ्यांची नोंदणी करताना फोटो आणि स्वाक्षरीची अचूक प्रतिमा अपलोड करणे बंधनकारक करण्यात आले आहे. इयत्ता बारावी विज्ञान शाखेतून उत्तीर्ण होऊन प्रथम वर्ष अभियांत्रिकी पदविका अभ्यासक्रमात प्रवेश घेतलेल्या विद्यार्थ्यांना प्रथम वर्षातील विषयांमध्ये सूट हवी असल्यास संस्थेने विद्यार्थ्यांच्या गुणपत्रिकेची पडताळणी करून ऑनलाइन एक्सेम्प्शन विषयाची माहिती भरावी, असेही मंडळाने सांगितले आहे. यामुळे पात्र विद्यार्थ्यांना अचूक सूट मिळेल आणि प्रक्रिया पारदर्शक राहील.थेट द्वितीय वर्षात प्रवेश घेतलेल्या विद्यार्थ्यांची ॲडमिशन लेव्हल एलिजिबिलिटीची माहिती संबंधित विभागीय कार्यालयाकडून निश्चित करून घेतल्यानंतरच त्यांची नोंदणी करण्यात येणार आहे. तंत्रशिक्षण संचालनालयाकडून प्रवेश निश्चित झालेल्या पात्र विद्यार्थ्यांचीच नोंदणी करण्याचे निर्देश मंडळाने दिले आहेत. यामुळे अवैध किंवा अपात्र प्रवेशांना आळा बसेल आणि केवळ पात्र विद्यार्थीच परीक्षा अर्ज प्रक्रिया पूर्ण करू शकतील.
एकूणच यंदाच्या प्रवेश प्रक्रियेतील वाढ आणि स्पष्ट मार्गदर्शक तत्त्वांमुळे पॉलिटेक्निक शिक्षण व्यवस्था अधिक सुव्यवस्थित होण्यास मदत होईल. विद्यार्थी आणि संस्थांनी दिलेल्या मुदतीत सर्व प्रक्रिया पूर्ण करून परीक्षेची तयारी सुरू ठेवावी, असे आवाहन मंडळाने केले आहे.
