SPPU: पुणे विद्यापीठ आणि मुंबई विद्यापीठातर्फे संयुक्त डिग्री प्रोग्रॅम
पुणे व मुंबई या दोन्ही विद्यापीठांमध्ये विद्यार्थ्यांना मार्गदर्शन मिळणार आहे. केवळ 25 विद्यार्थ्यांना या अभ्यासक्रमासाठी प्रवेश दिला जाणार असून त्यासाठी प्रवेश पूर्व परीक्षा घेतली जाणार आहे.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठ आणि मुंबई विद्यापीठातर्फे संयुक्त पदव्युत्तर पदवी अभ्यासक्रम सुरू केला जाणार आहे. पुणे विद्यापीठातील सेंटर फॉर एनर्जी स्टडीज आणि मुंबई विद्यापीठातील सेंटर फॉर नॅनो सायन्सेस अँड टेक्नॉलॉजी यांच्या संयुक्त विद्यमाने हा अभ्यासक्रम सुरू केला जाणार आहे, असे सावित्रीबाई फुले पुणे विद्यापीठाचे कुलगुरू सुरेश गोसावी यांनी पत्रकारांशी संवाद साधताना सांगितले.
नॅनो सायन्सेसचे वाढते महत्त्व आणि उद्योजकांची गरज विचारात घेऊन हा संयुक्त एमटेक अभ्यासक्रम तयार करण्यात आला आहे. पुणे व मुंबई या दोन्ही विद्यापीठांमध्ये विद्यार्थ्यांना मार्गदर्शन मिळणार आहे. केवळ 25 विद्यार्थ्यांना या अभ्यासक्रमासाठी प्रवेश दिला जाणार असून त्यासाठी प्रवेश पूर्व परीक्षा घेतली जाणार आहे. दोन्ही विद्यापीठांमध्ये अत्याधुनिक दर्जाची प्रयोगशाळा असल्याने विद्यार्थ्यांना दर्जेदार शिक्षण देणे शक्य होणार आहे.
बदलत्या काळानुसार एनर्जी नॅनो मटेरियल सेमीकंडक्टर मध्ये रोजगाराच्या संधी उपलब्ध होणार आहेत. सध्या सौर ऊर्जा हायड्रोजन इलेक्ट्रिक वाहने आणि प्रगत बॅटरी स्टोरेज या क्षेत्रात मोठे संशोधन सुरू आहे. त्यामुळे पारंपरिक ऊर्जा अभ्यासाला नॅनो तंत्रज्ञानाची जोड दिल्यास आणि त्या अनुषंगाने नवीन अभ्यासक्रम विद्यार्थ्यांना उपलब्ध करून दिल्यास त्याचा निश्चितच विद्यार्थ्यांना फायदा होणार आहे,असेही गोसावी यांनी सांगितले.
दरम्यान, कुलगुरू डॉ. सुरेश गोसावी यांनी मुंबई व पुणे विद्यापीठाच्या संयुक्त डिग्री बरोबरच विद्यापीठातर्फे भविष्यात काळात केल्या जाणाऱ्या शैक्षणिक उपक्रमात संदर्भातील माहिती दिली.
