आयुष्यात ‘चार एफ’ महत्त्वाचे; प्र-कुलगुरूंनी साधला ‘जेन-झी’शी संवाद

एज्युवार्ता न्यूज नेटवर्क 

 बदलत्या काळातील संधी आणि आव्हानांना सामोरे जात यशस्वी होण्यासाठी विद्यार्थ्यांनी आयुष्यातील ‘चार एफ’चा अंगीकार करावा, असे प्रतिपादन सावित्रीबाई फुले पुणे विद्यापीठाचे प्र-कुलगुरू डॉ. पराग काळकर यांनी केले. ‘फाइन्ड म्हणजे शोधा, फिक्स म्हणजे निश्चित करा, फाइट म्हणजे झुंजा आणि फिनिश म्हणजे पूर्ण करा,’ असा प्रभावी मंत्र त्यांनी युवा विद्यार्थ्यांना दिला.

खडकी शिक्षण संस्थेच्या टिकाराम जगन्नाथ कला, वाणिज्य व विज्ञान महाविद्यालयात मंगळवारी आयोजित ‘भविष्यवेध : युवा विद्यार्थ्यांशी संवाद’ या विशेष उपक्रमात डॉ. काळकर विद्यार्थ्यांशी संवाद साधला.यावेळी ते बोलत होते.कार्यक्रमास महाविद्यालयाचे प्राचार्य डॉ. संजय चाकणे, उपप्राचार्य जुगल नाईक, डॉ. सुचेता दळवी, उपप्राचार्य राजेंद्र लेले, प्राध्यापक, प्राध्यापकेतर कर्मचारी आणि मोठ्या संख्येने विद्यार्थी उपस्थित होते.

विद्यार्थ्यांनी सर्वप्रथम स्वतःच्या आवडी, क्षमता आणि ध्येयाचा शोध घ्यावा. त्यानंतर ध्येय निश्चित करून त्यासाठी योग्य नियोजन करावे. नियोजनाच्या अंमलबजावणीदरम्यान कितीही अडचणी आल्या तरी झुंज देत राहून हाती घेतलेले काम पूर्णत्वास नेणे, हाच यशाचा मार्ग असल्याचे डॉ. काळकर यांनी सांगितले.

महाविद्यालयाचे प्राचार्य डॉ. संजय चाकणे यांनी प्रास्ताविकात सांगितले की, आजची ‘जेन-झी’ पिढी तंत्रज्ञानाच्या सहवासात वाढलेली, कल्पक आणि माहितीसमृद्ध आहे. मात्र, उपलब्ध असलेल्या प्रचंड माहितीचे रूपांतर ज्ञानात, ज्ञानाचे कौशल्यात आणि कौशल्याचे यशात करणे, हे या पिढीसमोरील मोठे आव्हान आहे. विद्यार्थ्यांना करिअरची दिशा, ध्येय निश्चिती, वेळेचे नियोजन, कौशल्यविकास आणि तंत्रज्ञानाचा विधायक वापर याबाबत योग्य मार्गदर्शन मिळावे, या उद्देशाने ‘भविष्यवेध’ उपक्रमाचे आयोजन करण्यात आल्याचे त्यांनी सांगितले.

संवादादरम्यान डॉ. काळकर यांनी विचारलेल्या विविध प्रश्नांना विद्यार्थ्यांनी मनमोकळेपणाने उत्तरे दिली. खडकी शिक्षण संस्थेचे मुख्य कार्यकारी अधिकारी उत्तमकुमार इंदोरे यांच्या हस्ते डॉ. काळकर यांचा सत्कार करण्यात आला. कार्यक्रमाचे सूत्रसंचालन प्रा. स्वामीराज भिसे यांनी केले, तर आभार उपप्राचार्य राजेंद्र लेले यांनी मानले.