सीओईपी विद्यार्थ्यांना मोठा दिलासा; सुधारित शुल्क रचनेमुळे फी परत मिळणार
राज्याचे उच्च व तंत्र शिक्षण मंञालयाने एक महत्त्वपूर्ण निर्णय घेत सीओईपी तंत्रज्ञान विद्यापीठातील हजारो विद्यार्थ्यांना मोठा दिलासा दिला आहे. विद्यापीठाच्या सुधारित शुल्क रचनेमुळे विद्यार्थ्यांना शिक्षण शुल्काचा परतावा भहमिळणार असल्याने याचा थेट फायदा विद्यार्थ्यांना होणार आहे.
Eduvarta
एज्युवार्ता न्यूज नेटवर्क
राज्याचे उच्च व तंत्र शिक्षण मंञालयाने एक महत्त्वपूर्ण निर्णय घेत सीओईपी तंत्रज्ञान विद्यापीठातील हजारो विद्यार्थ्यांना मोठा दिलासा दिला आहे. विद्यापीठाच्या सुधारित शुल्क रचनेमुळे विद्यार्थ्यांना शिक्षण शुल्काचा परतावा भहमिळणार असल्याने याचा थेट फायदा विद्यार्थ्यांना होणार आहे. शैक्षणिक वर्ष २०२६-२७ पासून प्रवेश घेणाऱ्या विद्यार्थ्यांसाठी शुल्क रचनेत मोठा फेरबदल करण्याचा निर्णय घेण्यात आला आहे. यामुळे विविध शासकीय प्रवर्गातील विद्यार्थ्यांना शिक्षण शुल्क परताव्याचा जास्तीत जास्त लाभ मिळण्याचा मार्ग मोकळा झाला आहे.
विद्यापीठ प्रशासनाने शुल्क रचनेसंदर्भात विद्यार्थ्यांकडून आलेल्या निवेदनांची गंभीर दखल घेतली. विद्यार्थ्यांच्या मागण्यांकडे संवेदनशीलतेने पाहत आणि उच्च व तंत्र शिक्षण सर्वसामान्य विद्यार्थ्यांपर्यंत पोहोचवण्याची शासनाची भूमिका लक्षात घेऊन विभागातील वरिष्ठ अधिकाऱ्यांसोबत बैठक आयोजित करण्यात आली. या बैठकीत विद्यार्थ्यांच्या मागणीला सकारात्मक प्रतिसाद देत २०२६-२७ या शैक्षणिक वर्षासाठी जाहीर झालेल्या शुल्क रचनेची फेररचना करण्याचे स्पष्ट निर्देश देण्यात आले.
विद्यार्थ्यांना शिक्षण शुल्काच्या परताव्याचा अधिकाधिक लाभ मिळावा, या उद्देशाने शुल्क नियामक प्राधिकरणाच्या (एफआरए) मार्गदर्शक तत्त्वांनुसार सीओईपी तंत्रज्ञान विद्यापीठातील शुल्क रचनेत सुधारणा करण्यात येणार आहे. या सुधारणेनुसार शुल्क रचनेतील ‘इतर शुल्क’ हे शैक्षणिक शुल्कात समाविष्ट करण्याचे निर्देश दिले गेले आहेत. त्यामुळे शासनाकडून शिक्षण शुल्क परतावा मिळणाऱ्या विद्यार्थ्यांना आता अधिक लाभ मिळण्याची शक्यता निर्माण झाली आहे.
सुधारित शुल्क रचनेचा थेट फायदा इतर मागासवर्गीय, विमुक्त जाती व भटक्या जमाती, आर्थिकदृष्ट्या दुर्बल घटक तसेच सामाजिक व शैक्षणिकदृष्ट्या मागासवर्ग प्रवर्गातील विद्यार्थ्यांना होणार आहे. यासोबतच विद्यार्थिनींनाही शासनाकडून मिळणाऱ्या शिक्षण शुल्क परताव्याचा जास्तीत जास्त लाभ मिळण्याचा मार्ग खुला झाला आहे. या निर्णयामुळे आर्थिक अडचणींमुळे शिक्षणापासून वंचित राहणाऱ्या विद्यार्थ्यांना मोठा आधार मिळणार आहे.
सीओईपी तंत्रज्ञान विद्यापीठ हे महाराष्ट्रातील अग्रगण्य अभियांत्रिकी संस्थेपैकी एक असल्याने येथील शुल्क रचनेतील हा बदल विद्यार्थ्यांसाठी अत्यंत महत्त्वाचा ठरला आहे. या निर्णयामुळे पुढील शैक्षणिक वर्षापासून प्रवेश घेणाऱ्या अनेक विद्यार्थ्यांना आर्थिक दिलासा मिळेल, अशी अपेक्षा व्यक्त केली जात आहे.
