वरिष्ठ व निवड वेतनश्रेणी प्रशिक्षण 13 ते 22 नोव्हेंबर 2026 दरम्यान; मूल्यमापन व मार्गदर्शक सूचना जाहीर
राज्यातील प्राथमिक, माध्यमिक, उच्च माध्यमिक व अध्यापक विद्यालयातील अध्यापकाचार्यांसाठी वरिष्ठ वेतनश्रेणी व निवड वेतनश्रेणी प्रशिक्षण लवकरच सुरू होणार आहे.
Eduvarta
एज्युवार्ता न्यूज नेटवर्क
राज्यातील प्राथमिक, माध्यमिक, उच्च माध्यमिक व अध्यापक विद्यालयातील अध्यापकाचार्यांसाठी वरिष्ठ वेतनश्रेणी व निवड वेतनश्रेणी प्रशिक्षण लवकरच सुरू होणार आहे. राज्य शैक्षणिक संशोधन व प्रशिक्षण परिषद (SCERT) कार्यालयाने सर्व जिल्हा शिक्षण व प्रशिक्षण संस्था (DIET) तसेच जिल्हा परिषद कार्यालयांना वेळापत्रक आणि मार्गदर्शक सूचना पाठवल्या आहेत. त्यानुसार हे प्रशिक्षण दिनांक 13 नोव्हेंबर ते 22 नोव्हेंबर 2026 या कालावधीत जिल्हा व तालुका स्तरावर आयोजित केले जाईल. यापूर्वी राज्यस्तरीय व जिल्हास्तरीय प्रशिक्षण 28 ऑक्टोबर 2026 पर्यंत पूर्ण झालेले आहे. सर्व जिल्ह्यातील प्रशिक्षणार्थ्यांच्या यादी आता उपलब्ध झाल्या असून प्रशिक्षणाची तयारी जोरात सुरू आहे.
प्रशिक्षणाचे एकूण मूल्यमापन 200 गुणांवर आधारित असेल. उत्तीर्ण होण्यासाठी किमान 50 टक्के गुण आवश्यक आहेत. मूल्यमापनाचे दोन टप्पे आहेत. प्रशिक्षणकाळात 100 गुणांचे मूल्यांकन होईल. त्यात तंत्रज्ञानाच्या वापरातील 5 स्वाध्यायांसाठी 50 गुण आणि लेखी परीक्षेसाठी 50 गुण असतील. प्रशिक्षणानंतरच्या कालावधीतही 100 गुणांचे मूल्यांकन असेल. त्यात 5 लेखी स्वाध्यायांसाठी 50 गुण आणि प्रकल्प किंवा संशोधन अहवालासाठी 50 गुण राहतील. प्रत्येक टप्प्यात किमान 25 गुण आणि प्रत्येक स्वाध्यायात किमान 5 गुण मिळवणे बंधनकारक आहे. 50 टक्क्यांपेक्षा कमी गुण मिळाल्यास प्रशिक्षणार्थी अनुत्तीर्ण ठरेल आणि त्याला पुन्हा नोंदणी करून शुल्क भरून प्रशिक्षण पूर्ण करावे लागेल.
जिल्हा शिक्षण व प्रशिक्षण संस्थांचे प्राचार्य जिल्ह्याचे प्रशिक्षण प्रमुख म्हणून काम पाहतील. तालुकास्तरावर वरिष्ठ अधिव्याख्याता किंवा अधिव्याख्याता केंद्र समन्वयक म्हणून जबाबदारी सांभाळतील. ते पूर्णवेळ प्रशिक्षणस्थळी उपस्थित राहून संनियंत्रण करतील. गरज भासल्यास केंद्रप्रमुख, विस्तार अधिकारी, गटशिक्षणाधिकारी किंवा अध्यापकाचार्यांनाही समन्वयक म्हणून नेमले जाऊ शकते. पोर्टलद्वारे स्तरनिहाय व प्रकारनिहाय प्रशिक्षणार्थी संख्या उपलब्ध झाली आहे. त्यानुसार तालुकास्तरावर सुविधा असलेली स्थळे निश्चित करावीत.
एका प्रशिक्षणस्थळी किमान 1 वर्ग (50 प्रशिक्षणार्थी) आणि कमाल 4 वर्ग (200 प्रशिक्षणार्थी) या मर्यादेत नियोजन करावे. वर्ग निवडताना तळमजल्यावरील स्वच्छ आणि सुविधापूर्ण खोल्या प्राधान्याने निवडाव्यात. पिण्याचे पाणी, स्वतंत्र स्वच्छतागृह, इंटरनेट, एलसीडी प्रोजेक्टर आणि स्मार्ट क्लासरूम यांसारख्या सुविधा उपलब्ध असाव्यात. वाचनसाहित्य व घटकसंच पुरेशा प्रमाणात तयार ठेवावेत. ऑनलाईन प्रणालीवर सुलभक यादी, प्रशिक्षण स्थळ आणि समन्वयक यादी 5 नोव्हेंबर 2026 रोजी सायंकाळी 6.00 वाजेपर्यंत अद्ययावत करावी.
प्रत्येक वर्गात 6 ते 7 प्रशिक्षणार्थी असलेले 8 गट तयार करून 2 गटांसाठी 1 सुलभक नेमावा. सुलभकांनी निकषांनुसार मूल्यांकन करणे अपेक्षित आहे. प्रशिक्षण सुरू होण्यापूर्वी स्थळ, दिनांक, वेळ याबाबत इमेलद्वारे सूचना द्याव्यात. भोजन व अल्पोपहार सुविधा नसल्याचे स्पष्ट कळवावे. स्वाध्याय लेखनासाठी फुलस्केप कागद व वही सोबत आणण्याचे सांगावे. पूर्व व उत्तर चाचणी मोबाइलवर सोडविणे आवश्यक आहे. राष्ट्रीय शिक्षण धोरण 2020 आणि इतर संबंधित साहित्याचे वाचन करण्याचे आवाहन करावे.
प्रशिक्षणादरम्यान दैनंदिन स्वाक्षरी पत्रक पोर्टलवरून डाउनलोड करून प्रत्येक तासिकेत उपस्थिती नोंदवावी आणि विहित वेळेत अपलोड करावी. साहित्य वाटप करून पोहोच घ्यावी. शेवटी लेखी चाचणी घेऊन उपस्थिती प्रमाणपत्र द्यावे. प्रशिक्षणानंतर 40 दिवसांत 5 स्वाध्याय व प्रकल्प अहवाल जमा करण्याबाबत स्पष्ट सूचना द्याव्यात. अहवाल प्राप्त झाल्यानंतर सुलभकांना गुणांकन करण्यासाठी 2 दिवस निमंत्रित करावे. एकदा नोंदलेले गुण बदलता येणार नाहीत. सर्व संबंधित संस्थांनी या सूचनांचे काटेकोर पालन करून प्रशिक्षणाची यशस्वी अंमलबजावणी करावी.
