अकोल्याच्या डॉ. पंजाबराव देशमुख कृषी विद्यापीठाला भारतीय कृषी अनुसंधान परिषदेकडून ‘अ’ श्रेणीचा राष्ट्रीय दर्जा
अकोल्यातील डॉ. पंजाबराव देशमुख कृषी विद्यापीठाने कृषी शिक्षण, संशोधन आणि विस्तार क्षेत्रात उल्लेखनीय कामगिरी करत राष्ट्रीय स्तरावर मोठी झेप घेतली आहे.
एज्युवार्ता न्यूज नेटवर्क
अकोल्यातील डॉ. पंजाबराव देशमुख कृषी विद्यापीठाने कृषी शिक्षण, संशोधन आणि विस्तार क्षेत्रात उल्लेखनीय कामगिरी करत राष्ट्रीय स्तरावर मोठी झेप घेतली आहे. भारतीय कृषी अनुसंधान परिषदेच्या राष्ट्रीय कृषी शिक्षण अधिस्वीकृती मंडळाने विद्यापीठाला प्रतिष्ठेची ‘अ’ श्रेणी प्रदान केली आहे. या मानांकनामुळे विद्यापीठाच्या शैक्षणिक गुणवत्ता, संशोधन कार्य, दर्जेदार बीजोत्पादन आणि शेतकऱ्यांपर्यंत तंत्रज्ञान पोहोचविणाऱ्या विस्तार सेवांना राष्ट्रीय मान्यता मिळाली आहे.
भाकृअपच्या राष्ट्रीय कृषी शिक्षण अधिस्वीकृती मंडळाच्या ४४ व्या बैठकीत हा महत्त्वपूर्ण निर्णय घेण्यात आला. ही अधिस्वीकृती २९ मार्च २०२४ ते २८ मार्च २०२९ अशी पाच वर्षे लागू राहणार आहे. भाकृअपचे उपसचिव (कृषी शिक्षण) राजेश कुमार झा यांनी यासंदर्भातील अधिसूचना जारी केली आहे. अकोला येथील पदव्युत्तर शिक्षण संस्था, कृषी महाविद्यालय, उद्यानविद्या महाविद्यालय, कृषी अभियांत्रिकी व तंत्रज्ञान महाविद्यालय तसेच नागपूर आणि सोनापूर (गडचिरोली) येथील कृषी महाविद्यालयांमधील संबंधित अभ्यासक्रमांनाही या मान्यतेचा लाभ मिळणार आहे.

विद्यापीठाने कृषी शिक्षणाचे आधुनिकीकरण, संशोधनाचा विस्तार, गुणवत्तेच्या बियाण्यांची उपलब्धता आणि विस्तार प्रणालीद्वारे शेतकऱ्यांना आधुनिक तंत्रज्ञान पोहोचविण्यावर सातत्याने भर दिला आहे. अत्यल्प मनुष्यबळ असतानाही प्राध्यापक, संशोधक, अधिकारी, कर्मचारी आणि विद्यार्थ्यांच्या सामूहिक प्रयत्नांमुळे हे यश मिळाले. ‘शाश्वत शेती आणि संपन्न शेतकरी’ ही संकल्पना प्रत्यक्षात आणण्याच्या दिशेने हे मानांकन मोठे बळ देणारे ठरले आहे.
या यशात शिक्षण संचालक तथा अधिष्ठाता डॉ. देवानंद पंचभाई यांच्यासह विविध महाविद्यालयांचे सहयोगी अधिष्ठाता, प्राध्यापक, संशोधक आणि प्रशासकीय अधिकाऱ्यांचा महत्त्वाचा वाटा आहे. विद्यापीठाच्या या कामगिरीने कृषी शिक्षणाची गुणवत्ता वाढवणे, संशोधन अधिक उपयुक्त करणे आणि शेतकऱ्यांना सेवा पुरविणे या उद्दिष्टांना चालना मिळाली आहे.
कुलगुरू डॉ. शरद गडाख यांनी या यशाबद्दल समाधान व्यक्त करताना म्हटले की, अत्यल्प मनुष्यबळ असूनही सर्वांच्या अथक परिश्रमातून ‘अ’ श्रेणीचे मानांकन प्राप्त झाले आहे. यामुळे विद्यापीठाची जबाबदारी आणखी वाढली असून शिक्षणाचा दर्जा, संशोधनाची उपयुक्तता आणि शेतकऱ्यांना मिळणाऱ्या सेवांचा दर्जा सातत्याने उंचावून हे मानांकन टिकवण्यासाठी सर्वांनी एकजुटीने प्रयत्न करणे आवश्यक आहे.