नागपूर उपजिल्हाधिकाऱ्यांच्या मुलीसह दोन विद्यार्थिनी बेपत्ता; अपहरणाचे गुन्हे दाखल  

एज्युवार्ता न्यूज नेटवर्क 

नागपूर शहरात उपजिल्हाधिकाऱ्यांच्या अल्पवयीन मुलीसह दोन विद्यार्थिनी बेपत्ता (Two students missing) झाल्याने खळबळ उडाली आहे. हुडकेश्वर आणि बेलतरोडी परिसरातील या दोन्ही घटनांमध्ये पोलिसांनी अपहरणाचे गुन्हे (Crime of kidnapping) नोंदवून युद्धपातळीवर शोधमोहीम सुरू केली आहे. विशेष पथकांमार्फत सीसीटीव्ही फुटेज, तांत्रिक माहिती (CCTV footage, technical information) आणि इतर पुराव्यांच्या आधारे तपास सुरू असून दोन्ही मुलींचा शोध घेतला जात आहे.

पहिली घटना हुडकेश्वर पोलिस ठाण्याच्या हद्दीत घडली. बारावीत शिकणारी १७ वर्षीय विद्यार्थिनी उपजिल्हाधिकाऱ्यांची मुलगी आहे. ती सकाळी साडेनऊच्या सुमारास मैत्रिणीकडे जात असल्याचे सांगून घराबाहेर पडली. मात्र, सायंकाळपर्यंत ती घरी परतली नाही. कुटुंबीयांनी नातेवाईक आणि परिचितांकडे शोध घेतला, परंतु तिचा ठावठिकाणा लागला नाही. अखेर हुडकेश्वर पोलिस ठाण्यात तक्रार दाखल झाली आणि पोलिसांनी अपहरणाचा गुन्हा नोंदवला.

दुसरी घटना बेलतरोडी परिसरात घडली. नववीत शिकणारी १६ वर्षीय विद्यार्थिनी रात्री ७ वाजताच्या सुमारास मैत्रिणीकडे खेळायला जाण्याचा हट्ट करीत होती. उशीर झाल्याने वडिलांनी नकार दिला. घरात आजीशी आणि वडिलांसोबत वाद झाला. वडिलांनी मारल्याचे सांगितले जाते. संतापलेल्या विद्यार्थिनीने “मला तुमच्याजवळ राहायचे नाही” असे म्हणत घर सोडले. काही वेळाने ती परत आली, पण रात्री अकराच्या सुमारास पुन्हा घराबाहेर पडली आणि त्यानंतर परतलीच नाही. त्यानंतर बेलतरोडी पोलिसांनी पालकांच्या तक्रारीनंतर अपहरणाचा गुन्हा दाखल केला आहे.

या दोन्ही प्रकरणांमुळे नागपुरात चिंता व्यक्त होत असून पालकांमध्ये भीतीचे वातावरण निर्माण झाले आहे. पोलिसांनी दोन्ही ठाण्यांच्या पथकांना विशेष सूचना दिल्या असून विविध ठिकाणी शोध सुरू आहे. उपलब्ध पुराव्यांच्या आधारे तपास वेगाने सुरू ठेवण्यात आला आहे. दोन्ही विद्यार्थिनींचा लवकरात लवकर शोध घेण्यासाठी युद्धपातळीवर मोहीम सुरू असल्याची माहिती पोलिसांनी दिली आहे.