SPPU: विद्यापीठाची संशोधक सायली अतकरेची लिंडाऊ नोबेल लॉरिएट मीटिंगसाठी निवड

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या इलेक्ट्रॉनिक अँड इन्स्ट्रुमेंटेशन सायन्स विभागातील वरिष्ठ संशोधन फेलो तथा भौतिकशास्त्र विभागातील पीएच.डी. संशोधक कु. सायली नीलिमा राजेश अतकरे हिची जर्मनी येथे आयोजित ७५ व्या प्रतिष्ठित 'लिंडाऊ नोबेल लॉरिएट मीटिंग'साठी निवड झाली आहे. जगभरातील हजारो युवा संशोधकांमधून अत्यंत कठोर निवड प्रक्रियेद्वारे भारतातून निवडण्यात आलेल्या अवघ्या ११ गुणवंत युवा संशोधकांमध्ये सायलीचा समावेश आहे. या यशामुळे पुणे विद्यापीठाच्या शिरपेचात आणखी एक मानाचा तुरा रोवला गेला आहे.

मूळची अमरावती येथील असलेली सायली अतकरे विद्यापीठातील डॉ. श्वेता जगताप यांच्या मार्गदर्शनाखाली संशोधन करत आहे. ती 'Metal–Organic Frameworks' (MOFs) आधारित प्रगत नॅनोमटेरियल्सचा वापर करून पर्यावरणातील विषारी प्रदूषक ओळखण्यासाठी अत्याधुनिक इलेक्ट्रोकेमिकल सेन्सर्स विकसित करत आहे. पर्यावरण संरक्षण, सार्वजनिक आरोग्य आणि आधुनिक सेन्सर तंत्रज्ञानाच्या दृष्टीने हे संशोधन अतिशय महत्त्वपूर्ण मानले जाते. परिषदेदरम्यान तिला MOFs विषयातील जागतिक ख्यातीचे नोबेल विजेते शास्त्रज्ञ प्रा. ओमार याघी यांच्याशी थेट संवाद साधण्याची संधी मिळणार आहे.

सायलीच्या यशाबद्दल बोलताना मार्गदर्शिका डॉ. श्वेता जगताप आणि विभागप्रमुख प्रा. वि. ल. मठे म्हणाले की, "अमरावतीसारख्या शहरातून आलेली विद्यार्थिनी जागतिक व्यासपीठावर भारताचे प्रतिनिधित्व करत आहे, ही पुणे विद्यापीठासाठी अतिशय गौरवाची आणि देशभरातील युवा संशोधकांसाठी प्रेरणादायी बाब आहे."

----------------------

"मोठ्या शहरात किंवा नामांकित संस्थेत शिकल्याशिवाय जागतिक यश मिळत नाही, हा समज चुकीचा आहे. जिद्द, मेहनत, योग्य मार्गदर्शन आणि स्वतःवरील विश्वास असेल तर छोट्या शहरातूनही जगातील सर्वोच्च व्यासपीठापर्यंत पोहोचता येते. माझ्या यशामागे आईची शिस्त, कुटुंबाचा विश्वास आणि शिक्षकांचे मार्गदर्शन आहे.

- सायली अतकरे, संशोधक

--------------------------------------------------

अमरावती ते पुणे... यशाचा प्रवास

सायलीचे प्राथमिक ते पदवीपर्यंतचे शिक्षण अमरावती येथे श्री समर्थ हायस्कूल, ब्रिजलाल बियाणी विज्ञान महाविद्यालय आणि श्री शिवाजी विज्ञान महाविद्यालय येथे झाले. त्यानंतर पुण्यातील नौरोसजी वाडिया महाविद्यालयातून पदव्युत्तर शिक्षण पूर्ण करून तिने पुणे विद्यापीठात संशोधनाला सुरुवात केली. तिचे संशोधन 'केमिकल सोसायटी रिव्ह्यूज'सारख्या जागतिक दर्जाच्या वैज्ञानिक नियतकालिकात (जर्नल) प्रसिद्ध झाले आहे.

 काय आहे 'लिंडाऊ नोबेल लॉरिएट मीटिंग'?

जर्मनीत १९५१ पासून आयोजित होणारी 'लिंडाऊ नोबेल लॉरिएट मीटिंग' ही जगातील सर्वात प्रतिष्ठित वैज्ञानिक परिषदांपैकी एक आहे. यामध्ये नोबेल पारितोषिक विजेते शास्त्रज्ञ आणि जगभरातील निवडक युवा संशोधक एकत्र येऊन विज्ञानातील नवीन दिशा, जागतिक आव्हाने आणि भविष्यातील प्रगतीवर विचारमंथन करतात. या परिषदेत निवड होणे हा आंतरराष्ट्रीय स्तरावरील सर्वोच्च सन्मान मानला जातो.